Раслiнны куцюр

Беларускiя князёўны з Магiлёва робяць акцэнт на зёлках

Кароны з кветак i прутоў, упрыгажэннi з апельсiнавых корак i арэхавых шкарлупiнаў, i нарэшце, спаднiца з капусты i топ з буракоў. На ўсё гэта здатныя аматары раслiннага адзення з Магiлёўскай вобласцi.

Конкурс строяў, зробленых з выкарыстаннем раслiнаў, кветак i любога прыроднага матэрыялу, праходзiць у Магiлёўскай вобласцi дзясятак гадоў. Сёлета на "Рамонку-2010" умельцы з гарадоў i сельскiх раёнаў паказалi каля 200 строяў.

Вельмi ўразiла калекцыя "Беларускiя князёўны", створаная ў студыi фiтадызайну Магiлёўскага цэнтра экалагiчнага выхавання.

— Ідэя — у спалучэннi раслiнаў з нацыянальным беларускiм каларытам, — тлумачыць кiраўнiк студыi фiтадызайну Валянцiна Новiк. — Мы вырашылi вярнуцца ў сярэднявечча, да дваранскага строю, але ўпрыгожанага ў фiтастылi.

Статныя дзяўчыны ў сукенках, аздобленых раслiнамi, i ў арыгiнальных каронах выглядаюць шыкоўна, сапраўднымi князёўнамi. Аснова — тканiна, а ўпрыгажэннi — кветкi, лiсце, пруты i ўвогуле любы прыродны матэрыял iдзе ў справу.

— Паглядзiце: гэта лiсце барвiнку, засушаныя жамчужнiца i васiлькi, ракавiнкi, шкарлупiны грэцкiх арэхаў i фiсташак, гарбузовыя семачкi, костачкi слiў i алычы, — паказвае аздабленне княскiх строяў i нагрудныя ўпрыгажэннi Валянцiна.

На тэрыторыi цэнтра экалагiчнага выхавання, схаванай у глыбiнi прыватнага сектара амаль у цэнтры Магiлёва, увесну саджаюць i ўлетку старанна вырошчваюць раслiнны матэрыял, з дапамогай якога на свет i з'яўляюцца новыя калекцыi адзення ў студыi фiтадызайну.

— Я прыйшла ў студыю ў пачатку навучальнага года, — расказвае 14-гадовая вучанiца школы № 31 Веранiка Бараўская. — Мне спадабалася рабiць прыгожыя рэчы сваiмi рукамi. Цяпер магу стварыць любыя сувенiры з прыроднага матэрыялу. На гэта не патрэбны вялiкiя выдаткi, а падарунак будзе арыгiнальны, непаўторны.

Калекцыя "Беларускiя князёўны", як i многае iншае на конкурсе "Рамонак", не мае нiякага прыкладнога значэння. Гэта строi "ад куцюр" альбо, як кажуць у студыi, — для душы. На вулiцу ў такiм не выйдзеш — у натоўпе скамечацца i згубяцца ўсе ўпрыгажэннi, можна толькi прайсцiся па подыуме пад зачараванымi ад прыгажосцi поглядамi гледачоў.

— Цяпер ва ўсiм свеце аддаюць перавагу натуральным тканiнам i матэрыялам, хоць яны i даражэйшыя за штучныя, — кажа дырэктар цэнтра экалагiчнага выхавання Людмiла Шапялевiч. — Верагодна, што ў будучынi з'явяцца новыя тэхналогii, якiя дазволяць падобныя раслiнныя строi зрабiць паўсядзённым адзеннем. Пакуль жа на аснове фiтадызайну мы вучым ашчаднаму i адказнаму стаўленню да навакольнага асяроддзя. Вучым любiць разнастайнасць прыроды i захоўваць усё жывое вакол нас.

Калекцыi раслiнных строяў, якiя дэманструюцца публiцы на конкурсе "Рамонак", вельмi ўражваюць. Магiлёўскi цэнтр пазашкольнай працы "Пунсовыя ветразi" прадэманстраваў "Золата Алiмпа": iльняныя тогi, упрыгожаныя саломкай. Эфектна выглядае калекцыя "Зорная феерыя", якую прыдумалi ў магiлёўскай школе № 38: яркiя саламяныя зоркi на цёмна-сiнiх сукенках.

— Саломка на цёмных тканiнах — гэта заўсёды прыгожа, — каментуе Людмiла Шапялевiч. — Якраз вечаровыя сукенкi з саламянымi аплiкацыямi можна было б, у прынцыпе, ужываць у звычайным жыццi.

А ў магiлёўскай школе № 37 вырашылi, што самы прыдатны матэрыял для фiтастрою — гэта апельсiны, i назвалi сваю калекцыю "Апельсiнавы рай". Усе ўпрыгажэннi зробленыя з сушаных апельсiнавых корак, i лагiчна завяршае аранжавую кампазiцыю капялюш з апельсiнамi. Выхад гэтай калекцыi суправаджаўся ароматэрапiяй: пах апельсiнаў даносiўся да апошнiх радоў у зале.

Для стварэння раслiнных строяў у трапiчным стылi выкарыстоўваецца модны ва ўсiм свеце сезаль. Але сенсацыяй стаў строй, дзе спаднiцу зрабiлi з капусных лiстоў, а топ — з кружкоў бурака. Вось гэта сапраўдны куцюр!

Iлона Iванова.

Фота Iрыны Савосiнай.