Вы тут

Што адбываецца ў Юравічах?


«Не ўсё так проста. Не ўсё адназначна. Гэта вынік тых стасункаў, якія тут гадамі складаліся», — так сёння часцей за ўсё гавораць у Юравічах, дзе адбылося рэзананснае забойства.


Фота sk.gov.by

Пакуль у далёкім палескім аграгарадку Юравічы Калінкавіцкага раёна ідзе следства наконт гучнай крымінальнай справы, людзі размаўляюць з журналістамі на ўмовах ананімнасці: просяць не называць сапраўдных прозвішчаў, не фатаграфаваць твараў. Бо дагэтуль не ўпэўнены, як усё закончыцца на гэты раз. Затое дакладна ведаюць: шмат разоў тым, хто сёння названы падазраваным, усё сыходзіла з рук. Вось і мой суразмоўнік таксама застанецца ананімным. Але ж спачатку нагадаем сутнасць рэзананснай справы.

У аграгарадку Юравічы Калінкавіцкага раёна ў ноч з 3 на 4 лістапада кампанія мясцовых жыхароў жорстка збіла двух мужчын і прычыніла пашкоджанні цела жонцы аднаго з пацярпелых. Вечарам 4 лістапада 45-гадовы пацярпелы памёр у бальніцы. Па падазрэнні ў здзяйсненні злачынства затрымалі траіх раней судзімых грамадзян. У момант затрымання ўсе былі ў стане алкагольнага ап'янення.

Цяпер прыватнае меркаванне аднаго з жыхароў аграгарадка Юравічы наконт гэтай трагедыі і прычын, якія да яе прывялі:

— Гэта сітуацыя спела не адзін год. Забойства стала лагічным завяршэннем беспакаранасці, якая тут існавала. Усе жыхары Юравічаў пастаянна баяліся выканання пагроз. Таму большасць меркавала: абы ціха, пацерпім. Такая наша цярплівасць, якая ўсім бокам выйшла. Хоць у аграгарадку ёсць тыя людзі, якія не ішлі на повадзе ў хамства, якое доўгі час дэманстравалі крымінальныя грамадзяне. Яны ж шмат разоў змаглі выкруціцца. Калі нешта здаралася, яны пагражалі: я цябе заб'ю. Людзі так разважалі: «А што мы можам, калі ўчастковы ўсё ведае, але нічога не робіць? Ён жа з імі за руку вітаецца». Відаць, нават ночы такой не было, каб яны нешта недзе не выкралі. Адзін раз іх злавілі, калі ў хату залезлі, другі — калі сабак дваровых пастралялі. За сабак далі ўмоўны тэрмін самаму маладому. Неяк так атрымлівалася, што ўсё дарма праходзіла для гэтых людзей. Між тым, калі была гісторыя з сабакамі, — іх забойцы паднялі лямант, што быццам міліцыя іх затрымала, парушаючы іх законныя правы. І тут праваахоўнікі панаехалі, блогеры ўсялякія — іх абаранялі. Такі гвалт стварылі. Прынамсі, ніхто з праваабаронцаў нават слова не сказаў, што гэтае 17-гадовае «дзіцё» проста так пастраляла дваровых сабак. Цяпер у нас новы старшыня сельсавета, былы дырэктар школы. Ён нічога тут не можа зрабіць. Яго маці жыве цераз агароджу з гэтымі таварышамі. Канешне, не ўсё адназначна наконт матываў гэтага злачынства. Там быў нейкі канфлікт паміж тымі, з кім здарылася бойка. Але той, каго забілі, — ніяк не ўдзельнічаў у гэтых разборках. Ён проста хацеў заступіцца за суседа.

Афіцыйны прадстаўнік следчага камітэта па Гомельскай вобласці Марыя Крываногава паведаміла, што расследаванне крымінальнай справы аб забойстве і замаху на забойства вяскоўцаў працягваецца:

— З першага дня расследавання ў цэнтры пільнай увагі следчых — выяўленне прычын і ўмоў, якія спрыялі здзяйсненню злачынства. Супрацоўнікі Следчага камітэта высвятляюць якасць правядзення суб'ектамі прафілактыкі адпаведнай работы з падазраванымі, дастатковасць прынятых мер па забеспячэнні законнасці і правапарадку ў Юравічах.

Вядома, што падазраваныя на працягу доўгага часу дэманстравалі непавагу да грамадскага парадку, агрэсіўнымі паводзінамі запужвалі мясцовых жыхароў. Напрыклад, 25-гадовы вясковец сем разоў прыцягваўся да крымінальнай адказнасці за крадзеж і адзін раз — за незаконную здабычу рыбы. За апошнія восем гадоў ён восем разоў прыцягваўся да адміністрацыйнай адказнасці за дробны крадзеж, распіццё спіртнога ў грамадскім месцы і парушэнне правілаў дарожнага руху. Дарэчы, тры штрафы так і не выплаціў.

20-гадовы падазраваны раней прыцягваўся да крымінальнай адказнасці за хуліганства і пяць разоў — да адміністрацыйнай — за распіццё спіртнога ў грамадскім месцы, парушэнне ПДР. У яго адзін штраф дагэтуль не выплачаны.

17-гадовы вясковец прыцягваўся да крымінальнай адказнасці за крадзеж і незаконныя дзеянні ў адносінах да выбуховага рэчыва. У кастрычніку суд Калінкавіцкага раёна прызнаў непаўналетняга вінаватым у жорсткім абыходжанні з жывёламі і гвалце ў дачыненні да супрацоўніка органаў унутраных спраў. Яму далі два гады і адзін месяц абмежавання волі без накіравання ў выпраўленчую ўстанову і пасля абвяшчэння прысуду малады чалавек быў адпушчаны з залы суда. Між тым раённая пракуратура прынесла пратэст за мяккасць прызначанага пакарання. Дарэчы, з кастрычніка 2017 года па ліпень 2018-га непаўналетні восем разоў прыцягваўся да адміністрацыйнай адказнасці, у тым ліку за захоўванне па месцы жыхарства незарэгістраванай гладкаствольнай зброі, знаходжанне ў нецвярозым стане ў грамадскім месцы, парушэнне ПДР.

Пра такіх звычайна кажуць: кляймо няма дзе ставіць. Менавіта таму злачынства выклікала вялікі грамадскі рэзананс. Псіхалагічнае становішча ў аграгарадку стала яшчэ больш напружаным пасля здзяйснення невядомай асобай падпалу дома аднаго з падазраваных. Кіраўніцтва Следчага камітэта па Гомельскай вобласці правяло сельскі сход з мясцовымі жыхарамі. Марыя Крываногава расказвае, што ўсе меркаванні вяскоўцаў наконт крымінагеннага становішча ў Юравічах зафіксаваны:

— Нашы супрацоўнікі давялі вяскоўцам інфармацыю пра тое, як ідзе расследаванне крымінальнай справы, зафіксавалі іх меркаванні пра крымінагеннае становішча ў Юравічах, расказалі пра магчымасць ужывання мер бяспекі ў дачыненні да сведак, акцэнтавалі ўвагу на мерах крымінальнай адказнасці за здзяйсненне некаторых відаў злачынстваў, у тым ліку за падпал і неданясенне пра злачынства. Расследаванне крымінальнай справы працягваецца, яно знаходзіцца на асабістым кантролі начальніка УСК па Гомельскай вобласці. Дарэчы, падчас правядзення следчых дзеянняў і аператыўных мерапрыемстваў былі ўстаноўлены новыя факты па акалічнасцях здзейсненага злачынства. Выяўлены яшчэ адзін эпізод супрацьпраўнай дзейнасці двух затрыманых. Па даных следства, сёлета ў сакавіку двое мясцовых жыхароў, 1998 і 2001 гадоў нараджэння, выкарыстоўваючы тапарышча, збілі свайго аднавяскоўца.

На падставе сабраных па справе доказаў следствам 14 лістапада двум старэйшым грамадзянам прад'яўлена абвінавачанне па артыкулах аб забойстве чалавека і замаху на забойства трох чалавек, здзейсненых групай асоб. 20-гадоваму і непаўналетняму — па артыкуле аб асабліва злосным хуліганстве. Усе трое знаходзяцца пад вартай.

УСК па Гомельскай вобласці звяртаецца да грамадзян, якія валодаюць інфармацыяй пра супрацьпраўную дзейнасць падазраваных, з просьбай паведаміць яе супрацоўнікам Следчага камітэта па тэлефонах: (8 0232) 69-31-23, (8 029) 743-75-45.

Ірына АСТАШКЕВІЧ

Выбар рэдакцыі

Спорт

Фігурыст Юрый Гуліцкі: Думаю, турнір у Мінску будзе класны

Фігурыст Юрый Гуліцкі: Думаю, турнір у Мінску будзе класны

У дваццатых чыслах студзеня ў Мінску ўпершыню пройдзе маштабны турнір па фігурным катанні.

Грамадства

Дзе шукаць рэчы, забытыя ў грамадскім транспарце

Дзе шукаць рэчы, забытыя ў грамадскім транспарце

​Кожны з нас хоць раз у жыцці адчуваў сябе «машкай-разявашкай».

Калейдаскоп

На «Песні года Беларусі» артысты прызнаваліся ў любові да родных мясцін

На «Песні года Беларусі» артысты прызнаваліся ў любові да родных мясцін

У мінулую пятніцу ў Мінску прайшоў заключны канцэрт «Песні года Беларусі».