Вы тут

Каля 170 тысяч беларусаў маюць дзве і больш кватэры


Колькасць уладальнікаў дадатковага жылля павялічваецца штогод амаль на 10 %

Пра гэта паведаміў начальнік упраўлення падаткаабкладання даходаў і маёмасці фізічных асоб Міністэрства па падатках і зборах Андрэй Кавалеўскі. Ён нагадаў, што да 15 лістапада неабходна аплаціць зямельны падатак, падатак на нерухомасць і арэндную плату за зямельныя ўчасткі, якія знаходзяцца ў дзяржаўнай уласнасці. Ад падатку на нерухомасць вызваляюцца ўладальнікі адной кватэры. Тым, у каго іх дзве і больш, трэба гэты падатак плаціць. А такіх у нас крыху больш за 169 тысяч чалавек.


Паводле інфармацыі падатковага ведамства, плацельшчыкамі зямельнага падатку і падатку на нерухомасць у нашай краіне з'яўляюцца каля 2,8 мільёна фізічных асоб. Але з улікам разнастайных ільгот іх фактычна аплачваюць 1,5 мільёна грамадзян. Сёлета насельніцтву было прад'яўлена да выплаты 75,3 мільёна рублёў маёмасных падаткаў, з іх 42,4 мільёна рублёў — падатак на нерухомасць, 20,7 мільёна рублёў — зямельны падатак, а 12,2 мільёны рублёў — арэндная плата за зямлю.

Прадстаўнікі падатковай інспекцыі адзначылі, што за нявыплату згаданых падаткаў заканадаўствам прадугледжана накладанне пені і адміністрацыйнага штрафу, мінімум якога раўняецца палавіне базавай велічыні.

Андрэй Кавалеўскі паведаміў, што кожны год у нашай краіне падатковыя органы аналізуюць даходы і расходы 20—25 тысяч чалавек, якія здзейснілі буйныя пакупкі. Прыкладна пяці тысячам з іх прыходзіцца даплачваць падаткі па стаўцы 16 % гадавых.

Як вядома, цяпер карэктуецца новы Падатковы кодэкс, які, згодна з планамі, запрацуе ў нашай краіне з 1 студзеня наступнага года. Адказваючы на пытанні журналістаў, Андрэй Кавалеўскі ўдакладніў, што кардынальных змяненняў у аплаце зямельнага падатку і падатку на нерухомасць у 2019 годзе не будзе. Плануецца захаваць той жа парадак аплаты і тэрміны. Прапануецца таксама захаваць даволі вялікі аб'ём ільгот па аплаце гэтых падаткаў. «Яны даюцца асобным найбольш уразлівым катэгорыям насельніцтва — пенсіянерам, інвалідам, непрацаздольным асобам, шматдзетным сем'ям. Пакуль не плануецца ўводзіць і падаткаабкладанне кожнай кватэры — гэта значыць палёгку пры наяўнасці ва ўласнасці адной кватэры мяркуецца захаваць», — растлумачыў Андрэй Кавалеўскі.

Новы Падатковы кодэкс падрыхтаваны з улікам таго, што яго дзеянне будзе распаўсюджвацца на наступныя тры гады — 2019, 2020 і 2021-ы. За гэты час дзяржаўныя органы павінны адпрацаваць усе нюансы, якія ўзнікнуць у названы перыяд, у тым ліку магчымыя пытанні змены ўзносаў у фонд сацыяльнай абароны насельніцтва і іншыя прапановы. За тры гады павінны быць выпрацаваны адзіныя рашэнні па гэтых пытаннях, каб да 2022 года падрыхтаваць новую заканадаўчую базу, калі гэта будзе неабходна.

Андрэй Кавалеўскі падкрэсліў: «Падатковы кодэкс павінен дзейнічаць тры гады без змен, і гэта будзе вельмі зручна для падаткаплацельшчыкаў — арганізацый і грамадзян».

Сяргей КУРКАЧ

Выбар рэдакцыі

Спорт

Фігурыст Юрый Гуліцкі: Думаю, турнір у Мінску будзе класны

Фігурыст Юрый Гуліцкі: Думаю, турнір у Мінску будзе класны

У дваццатых чыслах студзеня ў Мінску ўпершыню пройдзе маштабны турнір па фігурным катанні.

Грамадства

Дзе шукаць рэчы, забытыя ў грамадскім транспарце

Дзе шукаць рэчы, забытыя ў грамадскім транспарце

​Кожны з нас хоць раз у жыцці адчуваў сябе «машкай-разявашкай».

Калейдаскоп

На «Песні года Беларусі» артысты прызнаваліся ў любові да родных мясцін

На «Песні года Беларусі» артысты прызнаваліся ў любові да родных мясцін

У мінулую пятніцу ў Мінску прайшоў заключны канцэрт «Песні года Беларусі».