Вы тут

Два конкурсы «Лістапада» ўжо падвялі вынікі


Усе пераможцы стануць вядомыя заўтра.

Услед за Конкурсам нацыянальных кінашкол, у якім галоўны прыз атрымала карціна «Той жа ж боль» Польскай нацыянальнай школы кіно, тэлебачання і тэатра ў Лодзі, пераможцаў назвала журы конкурсу фільмаў для дзіцячай і юнацкай аўдыторыі «Лістападзік». Цырымонія закрыцця апошняга з абвяшчэннем найлепшых і дэманстрацыяй бразільскай стужкі «Ціта і птушкі» адбылася ў кінатэатры «Піянер» учора. Тым часам на пляцоўках кінафестывалю завяршаюцца конкурсныя паказы і ўсё пакрысе падыходзіць да лагічнага завяршэння — заўтра на цырымоніі закрыцця «Лістапада» ў кінатэатры «Масква» будуць названыя ўладальнікі «золата», «серабра», прыза глядацкіх сімпатый і іншых узнагарод. У перадапошні дзень становіцца і радасна, і сумна.


Кадр з фільма «Супа Мода»

Конкурс нацыянальных кінашкол і «Лістападзік» па традыцыі падводзяць вынікі першымі. Журы «майстэрні» студэнцкага кіно апроч кінашколы ў Лодзі адзначыла дыпломамі работы Кыргызска-Турэцкага ўніверсітэта «Манас» і Мабільнай кінашколы DOCNOMADS. Сёлета ў конкурсе ўдзельнічала рэкордная колькасць фільмаў: калі ў мінулыя гады тут паказвалася каля пятнаццаці работ, то ў гэтым — дваццаць пяць, чатыры з якіх былі адзначаны членамі журы.

6 лістапада ў «Піянеры» прайшла цырымонія закрыцця «Лістападзіка». Яго сацыяльным партнёрам выступіў Дзіцячы фонд ААН (ЮНІСЕФ), прадстаўнікі якога ўдзельнічалі ў абмеркаваннях конкурсных работ з гледачамі. Мадэратарамі дыскусій выступалі пісьменніца і лаўрэат літаратурных прэмій «Пунсовыя ветразі» і «Запаветная мара» Яўгенія Пастэрнак і аўтар кніг для падлеткаў і сцэнарыст Андрэй Жвалеўскі. На цырымоніі ж гасцей сустракалі казачныя персанажы, пасля чаго ў зале былі абвешчаны пераможцы і паказаны фільм закрыцця «Ціта і птушкі» з Бразіліі.

Найлепшай, па версіі журы, стала работа «Супа Мода» Лікарыёна Вайнайны. Уладальнік «Залатога «Лістападзіка» ў гэтым годзе таксама ўключаны ў лонг-ліст карцін, намінаваных на саісканне прэміі «Оскар» як «найлепшы фільм на замежнай мове». Больш за тое, на 25-м «Лістападзе» «Супа Мода» пашырыла геаграфію Мінскага кінафестывалю: упершыню ў ім удзельнічала работа з Кеніі.

Чун Ча-Чун з фільма «Ведае толькі мора» і Філіпа Нігра, акцёр «Уцёкаў у Рым», атрымалі ўзнагароды ад журы за «найлепшую дзіцячую ролю» і «найлепшую работу дарослага ў дзіцячым фільме». Спецыяльны прыз журы за найлепшы сцэнарый атрымала карціна з Казахстана «На мяжы», а дыплом за найлепшае аператарскае мастацтва — эстонскі «Таварыш дзіця».

Таксама 6 лістапада ўвечары ў кінатэатры «Цэнтральны» французская актрыса Валеры Мерэс, вядомая па карцінах «Гэта не я, гэта — ён!», «Банзай», «Укол парасонам», а таксама зорка аўтарскага кіно, прадставіла фемінісцкую карціну «Адна спявае, другая не». Паказ прайшоў у рамках рэтраспектывы «Геніі кіно: Аньес Варда» і не сабраў поўнай залы, хаця фільм быў заяўлены праграмным дырэктарам «Лістапада» Ігарам Сукманавым як этапная стужка французскага кінематографа. Валеры Мерэс асобна павітала жанчын і мужчын, да якіх «яна ставіцца талерантна». Карціна была знята ў час, калі ў Францыі былі забаронены аборты, і сапраўды ў пэўным сэнсе стала рэвалюцыйнай для французскай грамадскасці.

Тым часам сённяшні дзень — перадапошні на «Лістападзе». Завяршаюцца паказы конкурсных фільмаў, праходзяць літаральна апошнія сустрэчы з аўтарамі, даецца апошняя магчымасць задаць пытанні прадстаўнікам здымачных груп. Насуперак усяму на кінафестывалі дзейнічае пляцоўка Нацыянальнага конкурсу, на якой беларускія аўтары прадстаўляюць свае работы публіцы. Сеансы праходзяць у кінатэатры «Беларусь». Заўтра кінафестываль працягнецца кінапаказамі і завяршыцца цырымоніяй закрыцця ў «Маскве», на якой будуць аб'яўлены ўсе пераможцы і ўручаны спецыяльныя прызы.

Заснавальнікамі кінафестывалю «Лістапад» выступаюць Міністэрства культуры і Мінгарвыканкам, магчымасці арганізатараў таксама пашырае генеральны партнёр банкаўская плацежная картка «Шчодрая» MasterCard, арганізатарамі — дарэчы, хутка будзе дзесяць год як — выступае Цэнтр візуальных і выканальніцкіх мастацтваў «Арт Карпарэйшн».

Уладальнікі «золата», «серабра», прыза глядацкіх сімпатый і іншых узнагарод стануць вядомыя заўтра ўвечары, інфармацыю пра пераможцаў можна будзе аператыўна знайсці на сайце кінафестывалю lіstapad.com.

Ірэна КАЦЯЛОВІЧ

Дадаць каментар

Выбар рэдакцыі

Грамадства

Партызанскія рукапісы — бясцэнныя сведчанні ваеннага часу

Партызанскія рукапісы — бясцэнныя сведчанні ваеннага часу

Партызанскія часопісы — насамрэч унікальныя інфармацыйныя зборнікі, значэнне і важнасць якіх разумелі ў тым ліку іх стваральнікі і чытачы.

Грамадства

Беларускія навукоўцы прадставілі больш за 300 распрацовак і тэхналогій

Беларускія навукоўцы прадставілі больш за 300 распрацовак і тэхналогій

На юбілейнай выстаўцы Нацыянальнай акадэміі навук.

Эканоміка

Ніна Жалязнова: Мы, беларусы, па сваёй ментальнасці — людзі зямлі

Ніна Жалязнова: Мы, беларусы, па сваёй ментальнасці — людзі зямлі

«Звязда» ўжо неаднойчы пісала пра гэту незвычайную жанчыну.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра ўрокі іншай мовы і шчасце, калі ў доме гаспадар.