Вы тут

Лукашэнка прагназуе яркі росквіт адносін Беларусі і Расіі


Такое меркаванне выказаў Аляксандр Лукашэнка падчас сустрэчы з Надзвычайным і Паўнамоцным Паслом Расіі ў Беларусі, спецыяльным прадстаўніком Прэзідэнта Расіі па развіцці гандлёва-эканамічнага супрацоўніцтва з Беларуссю Міхаілам Бабічам.


У пачатку нарады кіраўнік дзяржавы адзначыў, што звычайна на першай афіцыйнай сустрэчы кажуць нешта важнае ці пратакольнае. "Ну, напэўна, было б смешна, калі б я абмежаваўся нейкай пратакольнай заявай або выказваннем, хоць гэта таксама важна", — сказаў беларускі лідар.

Кіраўнік дзяржавы нагадаў Міхаілу Бабічу пра вялікую колькасць публікацый у інтэрнэце, прысвечаных яго прызначэнню. Пасол, у сваю чаргу, адзначыў, што чытаў усе.

"Сказаць, што там няма праўды нейкай долі, будзе несумленна. Калі сказаць, што там ёсць праўда, таксама будзе несумленна. Кожная група людзей, якія цікавяцца беларуска-расійскімі адносінамі, спрабавала праецыраваць праз асобу пасла — тым больш, вы ведаеце, што вельмі доўга працаваў ранейшы пасол, — нагадаў Прэзідэнт. — Тэма не была актуальнай,  а тут — прызначэнне новага пасла. І ў сілу нашых адносін з Расійскай Федэрацыяй праз асобу вашу спрабавалі нешта выказаць. Скажу шчыра, што больш было негатыву. Шчыра скажу, я хацеў бы, каб ваш перыяд работы ў дыпламатычным ведамстве, пасольстве нашай братэрскай Расіі ў Беларусі, быў самым актыўным, эфектыўным і прарыўным. Калі вы на гэта настроены — а ў мяне менавіта такое ўражанне, што вы менавіта настроены на такую працу, — лічыце, што ў нас так і атрымаецца".

На думку кіраўніка дзяржавы, гэта будзе перыяд самага яркага росквіту двухбаковых адносін Беларусі і Расіі. Упэўненасць у гэтым пацвярджаецца размовай беларускага лідара з Уладзімірам Пуціным, на якой неаднаразова абмяркоўвалася кандыдатура Міхаіла Бабіча на адказную пасаду. Расійскі Прэзідэнт, надзяляючы пасла Расіі дадатковымі маштабнымі паўнамоцтвамі (у тым ліку ў сферы эканомікі, чаго раней не бывала), звярнуў увагу, што Беларусь — гэта найважнейшая краіна, з якой Расія будзе выбудоўваць адносіны.

Беларускі лідар нагадаў, як, рэагуючы на некаторыя словы і дзеянні расійскіх улад, адкрыта казаў: зразумела, што Расія не хоча страціць Беларусь. "І я б сапраўды так, будучы ў кіраўніцтве Расіі, паводзіў сябе і перажываў за Беларусь, з кім яна будзе: ці яна паверне на Захад, як некаторыя пісакі, асабліва ў Расіі, гэта абмяркоўваюць і нашы, як я кажу, плявузгаюць тут пастаянна. Ці ж яна будзе разам з брацкай Расіяй, — адзначыў Аляксандр Лукашэнка. — Вы ведаеце, адкрыта скажу, мне паварочваць туды-сюды, напэўна, не да месца. Мне, Прэзідэнту, які ўжо адзін раз павярнуў ад заўзятага нацыяналізму і іншых антырасійскіх пытанняў, правёўшы рэферэндум у Беларусі, калі народ вызначаўся: мы з кім? І за саюз Беларусі і Расіі прагаласавала не проста большасць — пераважная большасць нашага насельніцтва".

На яго думку, і сёння беларускі народ бачыць у Расіі блізкага саюзніка, які заўсёды прыйдзе на дапамогу пры неабходнасці. Тым жа будзе адказваць і Беларусь.

"Непарушна адно, і вы гэта добра ведаеце: мы суверэнная і незалежная краіна. Калі ўжо шчыра казаць, не толькі дзякуючы памкненням нашага народа мы сталі суверэннай і незалежнай дзяржавай. Гэтага хацела Расія і тагачаснае кіраўніцтва Расіі", — падкрэсліў кіраўнік дзяржавы.

Ён таксама дадаў, што, паколькі цяперашняе кіраўніцтва заяўляла аб пераемнасці курсу, у XXI стагоддзі казаць пра ўключэнне Беларусі ў склад Расійскай Федэрацыі — проста смешна. "Я ні разу ад цяперашняга Прэзідэнта Расіі гэтага не чуў і ад мінулага, першага Прэзідэнта Расіі я ніколі пра гэта не чуў. Я думаю, мы выбудуем нармальныя адносіны, але я хачу, каб вы пра гэта пачулі з маіх вуснаў публічна, як я бачу нашы адносіны з Расійскай Федэрацыяй. Крыху бязладна, можа быць, я сказаў, я гатовы на гэтую тэму размаўляць, я думаю, мы агульную мову знойдзем, але я б вельмі-вельмі хацеў, яшчэ раз паўтару, каб мы зрабілі гэты перыяд, якім ганарыліся б і мае, і вашы дзеці", — падкрэсліў Аляксандр Лукашэнка.

У адказ Міхаіл Бабіч падзякаваў Прэзідэнту за цёплы прыём. Пасол адзначыў, што за першы месяц працы ў нашай краіне ў яго склалася ўражанне, што ён знаходзіцца тут досыць даўно, паколькі з першых дзён адчуў увагу і жаданне ўсіх калег зрабіць так, каб перыяд азнаямлення са становішчам быў як мага больш кароткі і эфектыўны.

Уладзіслаў ЛУКАШЭВІЧ

Фота БЕЛТА

Дадаць каментар

Выбар рэдакцыі

Эканоміка

 Эксперт: Да новага года рост цэн на нерухомасць спыніцца

Эксперт: Да новага года рост цэн на нерухомасць спыніцца

А калі і падрасце, то не больш чым на 0,5-1 працэнт.

Грамадства

Як і хто дапамагае змагацца з восамі ў кватэры?

Як і хто дапамагае змагацца з восамі ў кватэры?

Неяк ранкам я знайшла ў сябе на кухні некалькі вос. 

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.