Вы тут

Ірына Відава: Да жадання гатаваць абеды трэба дарасці


Звыклы сцэнічны імідж спявачкі Ірыны Відавай — вытанчаная бесклапотная бландзінка. Праўда, у апошні час вобраз паступова мяняецца: Ірына выдатна разумее, што добра ў 20 гадоў, у 40 выглядае некалькі найграна.

Прызнаюся, з сямейна-творчым дуэтам Ірына Відава і Алег Молчан знаёмая больш за дзесяць гадоў, а вось дадому да іх упершыню трапіла зусім нядаўна. Падстава была — наваселле. І гэтыя людзі адкрыліся з зусім іншага боку.


Хатняе відэа Ірыны Відавай

Ірына і Алег — мае суседзі — паміж нашымі дамамі адна станцыя метро. Кватэру яны купілі на другасным рынку, мяркуючы, што тут усё больш зразумела і празрыста. Мае значэнне і тое, якая склалася інфраструктура навакол. Дом у Пакроўскім квартале не з танных, але ў той жа час без асаблівых прэтэнзій на элітнае жыллё.

Зайшла я ў пад'езд і адзначыла, што ён некалькі абшарпаны, а дому ўсяго толькі 18 гадоў. У ліфце яшчэ захаваўся пах мыйных сродкаў: відаць, што зрабілі генеральную ўборку, але насценны жывапіс так і застаўся. На пляцоўцы Іры і Алега ацаніла свежафарбаваныя сцены.

І першае пытанне пасля прывітанняў было якраз пра сцены:

Заадно і на пляцоўцы зрабілі рамонт?

— Прыйшлося, — адказала Ірына. — Я не разумею, калі дома ў цябе чысціня і парадак, а месцы агульнага карыстання ў жаласным стане.

— На гарышчы быў жудасны бардак, — уключыўся ў размову Алег. — Нанялі клінінгавую кампанію, а Ірачка кіравала працэсам.

Вось вам і гламурная бландзінка, — смяюся.

І.В. — Так крыўдна, усё прыбралі, а неяк раніцай выходзім з кватэры — на пляцоўцы жудасны пах, нейкія бутэлькі, акуркі... Вырашыла высветліць, хто парадак нам псуе. Пачала шукаць сістэму відэаназірання ў пад'ездзе і знайшла кампанію «Мультысэрвісныя сістэмы», якая прапанавала ідэальныя для нас умовы: камера ўсталёўваецца на пляцоўцы, а праз камп’ютар і смартфон у мяне ёсць доступ да выявы ў рэжыме рэальнага часу. Калі нейкі візіцёр не спадабаецца, можна атрымаць запіс архіва. Прыемным бонусам было тое, што саму камеру купляць не трэба, яе дае фірма, а мы плацім толькі абаненцкую плату. Рамонт такая справа, што як бы скрупулёзна не складаў каштарыс, усё роўна будуць дадавацца нейкія выдаткі.

— У першыя ж суткі працы камеры высветлілі, што нашу пляцоўку аблюбаваў чалавек без пэўнага месца жыхарства. Выклікалі міліцыю, і больш мы яго тут не бачылі, — распавёў Алег.

І.В. — Другая гісторыя з курцамі. Выходжу — попел, акуркі, цыгарэтны дым. Прагледзела запіс: маладая пара, якая нядаўна пасялілася паверхам ніжэй. Аб'явы на кожным паверсе пра штраф за курэнне ў пад'ездзе іх не спынілі. Больш за тое, кажуць: "Гэта не мы". Прыйшлося звяртацца да ўчастковага, больш маладыя людзі ў пад'ездзе не паляць.

Ці не нажылі сабе ворагаў у новым доме?

І.В. — Не. Мы проста паказалі, як з гэтым можна эфектыўна і ў рамках закона змагацца.

Алег Молчан: сямейная лодка разбіваецца аб няўменне людзей дамаўляцца

Колькі бачыла Молчанаў, заўсёды захаплялася іх трапяткім стаўленнем адзін да аднаго. Яны разам 25 гадоў, а выглядаюць як маладыя закаханыя.

— Кажуць, творчым людзям нялёгка ўжыцца...

— Нам лёгка, таму што аднадумцы, — кажа Алег. — Я калі ўбачыў Іру, адразу зразумеў, што мне нельга яе ўпусціць: прыгожая, таленавітая, разумная. Мы неяк адразу вызначыліся з прыярытэтамі і каштоўнасцямі ў нашым агульным жыцці. Думаю, не кожная жонка лёгка б пагадзілася з тым, што частку заробку трэба адкладваць на творчае развіццё.

І.В. — З першай сустрэчы нам не хацелася расставацца, мы адразу адчулі сябе на адной хвалі. Неўзабаве ў нас з'явілася і песня з такой назвай.

— Іра, да сустрэчы з Алегам ты таксама пісала музыку. Гэта з твайго боку ахвяра або добра прадуманы крок?

— Дакладна не ахвяра. Я разумела, што Алег — не проста лепшы, ён — геній. Значыць, у мяне будзе выдатны рэпертуар. Але калі ты думаеш, што ўжо ў дзень знаёмства ён напісаў для мяне песню, то памыляешся. Ён доўга прыглядаўся да мяне на сцэне. Першая ж песня Алега ў маім рэпертуары мела поспех, на гэтым я завяршыла свае кампазітарскія практыкаванні. І не шкадую. Таму што як бы добра не складваліся асабістыя адносіны, творчая рэўнасць — рэч не з прыемных, а для нас важна, каб быў душэўны камфорт, узаемапавага.

Іра, табе было ўсяго 20 гадоў, калі сустрэлася з Алегам — не складана было ўзвальваць на сябе бытавыя пытанні?

І.В.— Першыя гады ён (быт) быў у нас вельмі палегчаны. Напрыклад, я амаль не гатавала — харчаваліся ў кафэ. Ведаеш, мне здаецца, вось да гэтага стану, калі з'яўляецца жаданне гатаваць абеды, рабіць нарыхтоўкі, трэба дарасці. Гэта павінна быць у радасць, а не змушана.

А.М. — Не вер, калі кажуць: сямейная лодка разбілася аб побыт. Яна разбіваецца аб няўменне людзей дамаўляцца. Побыт у наш час арганізаваць нескладана. Ствараць сям’ю трэба не дзеля наладжанага побыту ці, як гэта было гадоў сорак назад, дзеля легалізацыі сэксу, а для таго, каб побач быў блізкі і надзейны чалавек.

Зноў-такі, трэба ўмець правільна расставіць прыярытэты. Калі мы рыхтавалі юбілейны канцэрт Ірыны, разумеў, што зараз важней рэпетыцыі, і патрабаваць, каб у гэты час жонка яшчэ і абед гатавала, я не мог. Ведаю, наколькі Іра патрабавальная да сябе і да ўсіх удзельнікаў шоу, разумею, якая гэта нялёгкая праца. Ды і я за раялем не падарунак: сем патоў з музыкаў выганю.

На што музыкантам не шкада грошай у Парыжы

— Знаю, што пры падрыхтоўцы канцэртаў, мадэль паводзінаў "зрабіце нам бясплатна або за тры капейкі" вы не прымаеце. А яшчэ неяк пасля сумесных вячорак у кафэ, я заўважыла, што кашалёк у Іры. Чаму так?

А.М. — Тут усё проста: бясплатна або за тры капейкі не будзе добра. Праграмка за тры капейкі адрозніваецца ад вырабленай у добрай паліграфічнай кампаніі, як і фотасесія майстра ад здымка на смартфон. Ірынін юбілейны канцэрт атрымаў высокую ацэнку публікі і прэсы. Больш за тое, нас папрасілі паўтарыць яго на біс. Я перакананы, што ў нашай краіне можа быць якаснае шоу, калі за справу бяруцца прафесіяналы і не шкадуюць грошай. У шоу-бізнэсе, як і ў звычайным, дзейнічае правіла: каб атрымаць, трэба інвеставаць.

І.В. — Алег не любіць наяўныя грошы, асабліва з капейкамі неяк не пасябраваў. Кажуць, каралі таксама ходзяць без грошай. У мужа ў партаманэ картка, праўда, я заўсёды імкнуся і некалькі купюр пакласці туды. Вядома, мы агаворваем усе буйныя траты, а ў штодзённых выдатках ніхто нікога не кантралюе.

А.М. — Абсалютна спакойна давяраю Іры грошы. Яна з юных гадоў зарабляе і разумее ўсяму кошт. Але вось жанчыне, якая не працуе і ведае толькі слова «дай», я кашалёк бы не даверыў.

— Сваё сярэбранае вяселле вы адзначылі ў Францыі. Зрабілі набег на галерэю Лафайет? Часта падарожнічаеце?

І.В. — Калі шчыра, то ў гэтай галерэі кошты вельмі завышаныя. Мы любім якаснае адзенне, але па разумных цэнах. Пераплачваць за брэнд ці месца продажаў не бачу сэнсу. Але касметыкі трошкі ў Францыі набыла.

А.М. — Падарожнічаць хацелася б часцей. Мы аддаем перавагу пазнавальнаму адпачынку. Прагуляліся па Манмартру, наведалі Луўр, пабывалі на магіле Шапэна. І калі ў галерэі мы не раскідваліся грашыма, то на наведванне "Мулен Руж" не шкадавалі. Я лічу, што ў праграме адпачынку музыканта абавязкова павінны быць канцэрты, шоу і іншыя культурныя складнікі.

Аксана ЯНОЎСКАЯ

Фота: Аляксей Волкаў, асабісты архіў Ірыны Відавай і Алега Молчана

Дадаць каментар

Выбар рэдакцыі

Эканоміка

 Эксперт: Да новага года рост цэн на нерухомасць спыніцца

Эксперт: Да новага года рост цэн на нерухомасць спыніцца

А калі і падрасце, то не больш чым на 0,5-1 працэнт.

Грамадства

Як і хто дапамагае змагацца з восамі ў кватэры?

Як і хто дапамагае змагацца з восамі ў кватэры?

Неяк ранкам я знайшла ў сябе на кухні некалькі вос. 

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.