25 Верасень, аўторак

Вы тут

Прэзідэнт змяніў кіраўніцтва ўрада


Прэзідэнт Беларусі Аляксандр Лукашэнка змяніў кіраўніцтва ўрада. Адпаведныя кадравыя рашэнні агучыў кіраўнік дзяржавы.


Сяргей Румас.

Андрэя Кабякова на пасадзе прэм’ер-міністра  Беларусі змяніў Сяргей Румас. Да гэтага ён узначальваў “Банк развіцця Рэспублікі Беларусь”. Яго першым намеснікам назначаны Аляксандр Турчын, які да гэтага ўзначальваў Апарат Саўміна.

Румас Сяргей Мікалаевіч нарадзіўся ў 1969 годзе ў Гомелі. У 1990 годзе скончыў Яраслаўскае вышэйшае ваеннае фінансавае ордэна Чырвонай Зоркі вучылішча і да 1992 года праходзіў службу ва Узброеных Сілах. У 1995 годзе ён скончыў Акадэмію кіравання пры Кабінеце Міністраў Рэспублікі Беларусь.

У 1992—1994 гадах быў начальнікам улікова-аперацыйнага аддзела, крэдытнага аддзялення, эканамічнага аддзела спецыялізаванага ўпраўлення Нацыянальнага банка Беларусі.

З мая па жнівень 1994 года — намеснік старшыні праўлення КБ «Поўнач-Захад» Мінска. Затым да 1995 года з'яўляўся намеснікам старшыні праўлення АКБ «Садружнасць» Мінска.

У 1995-2002 гадах — дырэктар філіялаў № 507 і № 514 ААТ «ААБ Беларусбанк».

З 2002 па 2005 год займаў пасады намесніка старшыні, а затым першага намесніка старшыні праўлення ААТ «ААБ Беларусбанк».

Пасля перайшоў працаваць старшынёй праўлення ААТ «Белаграпрамбанк» і займаў гэту пасаду да 2010 года.

У 2010-2012 гадах — намеснік прэм'ер-міністра Беларусі. Затым быў назначаны старшынёй праўлення Банка развіцця Беларусі.

Аляксандр Турчын.

Турчын Аляксандр Генрыхавіч, першы намеснік прэм'ер-міністра, нарадзіўся ў 1975 годзе ў Навагрудку. У 2002 годзе скончыў Беларускі дзяржаўны эканамічны ўніверсітэт, у 2009 годзе — Акадэмію кіравання пры Прэзідэнце Беларусі.

У 1997—1998 гадах быў дырэктарам магазіна калгаса «Авангард» Навагрудскага раёна.

Са студзеня па ліпень 1999 года — дзяржаўны падатковы інспектар інспекцыі дзяржаўнага падатковага камітэта па Навагрудскім раёне.

У 1999—2004 гадах займаў пасаду галоўнага кантралёра-рэвізора кантрольна-рэвізійнага ўпраўлення Міністэрства фінансаў па Навагрудскім раёне, затым па Гродзенскай вобласці. У далейшым да 2007 года ўзначальваў фінансавы аддзел Карэліцкага райвыканкама Гродзенскай вобласці.

З 2007 па 2010 год быў намеснікам старшыні Карэліцкага райвыканкама.

У 2010-2012 гадах — старшыня камітэта эканомікі Мінскага аблвыканкама. Затым да 2015 года займаў пасаду намесніка старшыні Мінскага аблвыканкама.

З 2015 па 2016 год — памочнік Прэзідэнта Беларусі — галоўны інспектар па Гомельскай вобласці. З 2016 года кіраваў Апаратам Савета Міністраў Беларусі.

Пасаду намесніка прэм’ер-міністра заняў Ігар Ляшэнка ( да гэтага старшыня канцэрна “Белнафтахім”). Ігар Ляшэнка будзе вырашаць пытанні, якімі займаўся Уладзімір Сямашка.

Ігар Ляшэнка.

Ляшэнка Ігар Васільевіч, намеснік прэм'ер-міністра, нарадзіўся ў 1974 годзе ў горадзе Ачамчыра Абхазскай АССР. У 1996 годзе скончыў Гомельскі дзяржаўны ўніверсітэт.

У снежні 1996 года працаваў падатковым інспектарам Дзяржаўнай падатковай інспекцыі па Савецкім раёне Гомеля.

У 1997—1998 гадах — інжынер другой катэгорыі аддзела маркетынгу Гомельскага хімічнага завода. З 1998 па 2006 год быў начальнікам планава-эканамічнага аддзела на гэтым прадпрыемстве. У 2006—2013 гадах — дырэктар Гомельскага хімічнага завода.

Затым быў назначаны першым намеснікам старшыні канцэрна «Белнафтахім». Узначальваў яго з 2014 года.

Пытанні будаўніцтва, ЖКГ, транспарту будзе курыраваць намеснік прэм’ера Уладзімір Кухараў. “Гэта аснова. А далей вам вызначацца ва ўрадзе, як вы размяркуеце гэтыя абавязкі”, — падкрэсліў беларускі лідар. Раней Уладзімір Кухараў працаваў намеснікам старшыні Камітэту дзяржаўнага кантролю.

Уладзімір Кухараў.

Кухараў Уладзімір Яўгенавіч, намеснік прэм'ер-міністра, нарадзіўся ў 1972 годзе ў вёсцы Ціманава Клімавіцкага раёна Магілёўскай вобласці. У 1993 годзе скончыў Магілёўскі дзяржаўны педагагічны ўніверсітэт імя А. А. Куляшова, у 1999 годзе — Беларускі недзяржаўны інстытут правазнаўства, у 2012 годзе — Акадэмію кіравання пры Прэзідэнце Беларусі.

У 1993—1999 гадах быў дырэктарам Барысавіцкай няпоўнай сярэдняй школы Клімавіцкага раёна, потым сярэдняй школы № 3 Клімавічаў.

З 1999 па 2009 год займаў розныя пасады ў структурах Камітэта дзяржаўнага кантролю.

Затым па 2012 год з'яўляўся кіраўніком адміністрацыі Цэнтральнага раёна Мінска.

У 2012—2016 гадах — першы намеснік старшыні Мінскага гарвыканкама.

У 2016 годзе зноў вярнуўся ў Камітэт дзяржаўнага кантролю, але ўжо на пасаду намесніка старшыні ведамства.

За сацыяльную сферу — адукацыю, медыцыну, культуру, спорт будзе адказваць Ігар Петрышэнка, які да сёння працаваў паслом Беларусі ў Расіі.

Ігар Петрышэнка.

Петрышэнка Ігар Віктаравіч, намеснік прэм'ер-міністра, нарадзіўся ў 1965 годзе ў вёсцы Неглюбка Веткаўскага раёна Гомельскай вобласці. У 1986 годзе скончыў Вільнюскае каманднае вучылішча радыёэлектронікі, у 1992 годзе — Ваенны Чырванасцяжны інстытут, у 1998 годзе — Акадэмію кіравання пры Прэзідэнце Беларусі.

У 1986—1996 гадах праходзіў службу ва Узброеных Сілах.

З 1996 па 1999 год — саветнік, галоўны саветнік, начальнік дагаворна-прававога ўпраўлення апарату міністра па справах СНД Апарату Кабінета Міністраў Беларусі, затым Апарату Савета Міністраў Беларусі.

У 1999—2003 гадах займаў пасады начальніка ўпраўлення міждзяржаўнага супрацоўніцтва Апарату Савета Міністраў, намесніка начальніка галоўнага ўпраўлення міждзяржаўнага супрацоўніцтва і гандлю — начальніка ўпраўлення міжнароднага супрацоўніцтва Апарату Савета Міністраў.

З лютага па жнівень 2003 года быў намеснікам начальніка ўпраўлення Расіі і Саюзнай дзяржавы Міністэрства замежных спраў.

У 2003—2007 гадах — саветнік пасольства Беларусі ў Расіі.

У 2007—2008 гадах быў начальнікам упраўлення Расіі і Саюзнай дзяржавы МЗС, пасля чаго назначаны першым намеснікам міністра замежных спраў Беларусі і займаў гэту пасаду да 2012 года.

Затым з'яўляўся Надзвычайным і Паўнамоцным Паслом Беларусі ў Расіі, Пастаянным прадстаўніком Беларусі пры Эканамічным савеце СНД, Паўнамоцным прадстаўніком пры АДКБ па сумяшчальніцтве і спецыяльным прадстаўніком Беларусі па пытаннях інтэграцыйнага супрацоўніцтва.

“На парадку дня гэтыя пытанні стаяць даўно. Прынамсі, перада мной як Прэзідэнтам. А ў апошні час яны набылі асаблівае гучанне ў сувязі з мерапрыемствам на ўсходзе Беларусі. Тады мной было прынята рашэнне абнавіць наш урад, асабліва кіраўніцтва. Было даручана кіраўніку Адміністрацыі правесці кансультацыі з адпаведнымі службовымі асобамі, вярнуцца да рэзерву кадраў Прэзідэнта, правесці кансультацыі з кіраўнікамі арганізацый грамадзянскай супольнасці нашай краіны”, — адзначыў Прэзідэнт.

Акрамя таго, новае кіраўніцтва атрымалі і некалькі міністэрстваў краіны. Міністэрства архітэктуры і будаўніцтва ўзначаліць Дзмітрый Мікулёнак, які працаваў дырэктарам камунальнага ўнітарнага прадпрыемства "Упраўленне капітальнага будаўніцтва Мінгарвыканкама".

Дзмітрый Мікулёнак.

Мікулёнак Дзмітрый Міхайлавіч, міністр архітэктуры і будаўніцтва, нарадзіўся ў 1973 годзе. Скончыў Беларускую дзяржаўную політэхнічную акадэмію ў 1996 годзе і Акадэмію кіравання пры Прэзідэнце Беларусі ў 2006 годзе.

У 1996—2004 гадах — інжынер, майстар па будаўніцтве, правядзенні работ, начальнік вытворчага аддзела будаўнічага ўпраўлення № 256 Мінскага арэнднага прадпрыемства індустрыяльнага домабудавання «Мінскжылбуд» (у 2001 годзе пераўтворана ў ААТ «МАПІД»).

З 2004 па 2006 год быў галоўным спецыялістам КУП «Упраўленне капітальнага будаўніцтва Мінгарвыканкама», затым намеснікам дырэктара па ўзвядзенні будынка Нацыянальнай бібліятэкі КУП «Упраўленне капітальнага будаўніцтва Мінгарвыканкама».

У 2006—2011 гадах — галоўны інжынер — першы намеснік дырэктара КУП «Упраўленне капітальнага будаўніцтва Мінгарвыканкама». З 2011 года быў дырэктарам прадпрыемства.

Новым міністрам прамысловасці стаў Павел Уцюпін. “Ведаеце сферу. Вы там, па-мойму, гадоў пяць прапрацавалі. І вельмі добра, што вы працавалі і ў Міністэрстве эканомікі”, — кажа Аляксандр Лукашэнка.

Павел Уцюпін.

Уцюпін Павел Уладзіміравіч, міністр прамысловасці, нарадзіўся ў 1976 годзе ў сяле Папоўка Харольскага раёна Прыморскага краю Расіі. У 1998 годзе скончыў Беларускі дзяржаўны эканамічны ўніверсітэт, у 2007 годзе — Акадэмію кіравання пры Прэзідэнце Беларусі.

У 1994—1995 гадах быў намеснікам дырэктара па знешнеэканамічных сувязях малога прадпрыемства «Дубль В» (Барысаў).

З 1995 па 1999 год — начальнік аддзела знешнеэканамічных сувязяў вытворча-камерцыйнай фірмы «УТВ» (Барысаў).

З лютага па лістапад 1999 года — эканаміст планава-эканамічнага аддзела сумеснага беларуска-германска-расійскага прадпрыемства «Фрэбор».

У 1999—2002 гадах — аспірант Беларускага дзяржаўнага эканамічнага ўніверсітэта. Пасля да 2006 года займаў пасады саветніка і галоўнага саветніка старшыні Магілёўскага аблвыканкама.

З 2006 па 2011 год — намеснік генеральнага дырэктара па эканоміцы і фінансах ААТ «Белшына».

У 2011 годзе назначаны намеснікам міністра прамысловасці, у 2017-м — намеснікам міністра эканомікі.

Міністэрствам эканомікі будзе кіраваць былы першы намеснік міністра Дзмітрый Крутой. Прэзідэнт звярнуў увагу, што Міністэрству эканомікі трэба набыць “новае дыханне” і прыстасавацца да “новых рэаліяў”.

Дзмітрый Крутой.

Крутой Дзмітрый Мікалаевіч, міністр эканомікі, нарадзіўся ў 1981 годзе ў пасёлку Бялынічы Магілёўскай вобласці. У 2003 годзе скончыў Беларускі дзяржаўны тэхналагічны ўніверсітэт, у 2010 годзе — Акадэмію кіравання пры Прэзідэнце Беларусі.

Са жніўня 2003 года па 2004 год — інжынер кафедры эканомікі і кіравання на прадпрыемствах хіміка-ляснога комплексу Беларускага дзяржаўнага тэхналагічнага ўніверсітэта, аспірант ВНУ.

У 2004—2006 гадах — вядучы, галоўны эканаміст сектара арганізацыі аплаты працы і цэнаўтварэння ўпраўлення эканомікі і інвестыцый Міністэрства лясной гаспадаркі.

У 2006—2014 гадах — намеснік начальніка ўпраўлення ляснога комплексу галоўнага ўпраўлення аграпрамысловага і ляснога комплексаў Міністэрства эканомікі, затым намеснік начальніка галоўнага ўпраўлення аграпрамысловага і ляснога комплексаў — начальнік упраўлення ляснога комплексу.

У 2014 годзе назначаны намеснікам міністра эканомікі, у 2017 годзе — першым намеснікам міністра.

Беларускі лідар наступным чынам прадставіў новага міністра сувязі і інфарматызацыі Канстанціна Шульгана: “Чалавек дысцыплінаваны, ваенны, які вельмі добра ведае гэтую сферу, і асабліва перспектыву развіцця, звязаную з інфармацыйнымі тэхналогіямі, стварэннем вялікай удзельнай вагі ў эканоміцы IT-сферы”.

Канстанцін Шульган.

Шульган Канстанцін Канстанцінавіч, міністр сувязі і інфарматызацыі, нарадзіўся ў горадзе Бяроза Брэсцкай вобласці. У 1989 годзе скончыў Мінскае вышэйшае інжынернае зенітнае ракетнае вучылішча проціпаветранай абароны.

З чэрвеня 1989 года па студзень 1995 года праходзіў службу на пасадах інжынера трэцяга аддзела вайсковай часці 51458 і старшага афіцэра чацвёртага аддзела Дзяржаўнага цэнтра бяспекі інфармацыі пры Міністэрстве абароны Беларусі.

Затым па чэрвень 2008 года займаў пасады старшага афіцэра, галоўнага спецыяліста, начальніка групы, начальніка аддзела ў структуры Дзяржаўнага цэнтра бяспекі інфармацыі пры Савеце бяспекі Беларусі.

У 2008—2013 гадах праходзіў ваенную службу на афіцэрскіх пасадах у Аператыўна-аналітычным цэнтры пры Прэзідэнце Беларусі. У красавіку 2016 года назначаны намеснікам начальніка ААЦ.

Змяніўся і старшыня Дзяржаўнага ваенна-прамысловага камітэта. Ім стаў Раман Галоўчанка. Акрамя вопыту ў гэтай сферы, Раман Галоўчанка займаў пасады і пасла ў некаторых краінах.

Раман Галоўчанка.

Галоўчанка Раман Аляксандравіч, старшыня Дзяржаўнага ваенна-прамысловага камітэта, нарадзіўся ў 1973 ў Жодзіне.

У 1996 годзе скончыў Маскоўскі дзяржаўны інстытут міжнародных адносін МЗС Расіі, у 2003 годзе —  Акадэмію кіравання пры Прэзідэнце Беларусі.

У 1996—1997 гадах з'яўляўся рэферэнтам старшыні праўлення, намеснікам генеральнага дырэктара ЗАТ «Белтэхэкспарт».

З 1997 па 2002 год — галоўны спецыяліст Дзяржаўнага сакратарыята Савета бяспекі Беларусі.

У 2002—2005 гадах — намеснік начальніка аддзела па наглядзе за выкананнем законаў у ваенна-прамысловым комплексе пракуратуры Беларусі.

Затым да 2006 года быў галоўным саветнікам упраўлення знешняй палітыкі Адміністрацыі Прэзідэнта Беларусі.

У 2006—2009 гадах — галоўны саветнік аддзела супрацоўніцтва ў сферы міжнароднай бяспекі, галоўны саветнік упраўлення міжнароднай бяспекі Дзяржаўнага сакратарыята Савета бяспекі.

З ліпеня па снежань 2009 года — саветнік-пасланнік пасольства Беларусі ў Польшчы.

Затым назначаны першым намеснікам старшыні Дзяржаўнага ваенна-прамысловага камітэта Беларусі, займаў гэтую пасаду да 2013 года.

У красавіку 2013 года стаў Надзвычайным і Паўнамоцным Паслом Беларусі ў Аб'яднаных Арабскіх Эміратах, пазней па сумяшчальніцтве — у Катары, Кувейце і Саудаўскай Аравіі.

Пасля свайго назначэння Сяргей Румас сказаў журналістам, што ўсе праграмныя дакументы на пяцігодку, неабходныя для работы ўрада і ўстойлівага функцыянавання эканомікі, прынятыя. І ўрад будзе па іх працаваць.

Адзнакай працы ўрада будзе рост дабрабыту насельніцтва.

“Разам з гэтым кіраўнік дзяржавы падкрэсліў некалькі важных акцэнтаў, якія павінны быць уласцівыя абноўленаму складу ўрада. Першае — дысцыпліна. Напэўна, не сакрэт, што прычынай кадравых змяненняў ва ўрадзе з'явіліся пытанні, якія выявіліся ў Оршы, і цэлы шэраг іншых пытанняў. Кіраўнік дзяржавы пачаў з гэтага — пытанні дысцыпліны, прыстойнасці і пытанні дабрабыту людзей”, — паведаміў прэм'ер-міністр.

Сяргей Румас падкрэсліў, што адзнакай працы ўрада будзе рост дабрабыту насельніцтва.


"Калі я прымаў рашэнні ў Оршы, некаторыя ў грамадстве гэта ўспрынялі як нейкае спантаннае рашэнне. А некалькі чалавек так падумалі, што, можа быць, не варта было за адно мерапрыемства Аршанскага рэгіёна, усходняга рэгіёна, так жорстка крытыкаваць урад. Дык вось, я хачу сказаць: справа не толькі ў Оршы. Гэта апошняя кропля, якая перапоўніла чашу цярпення. Галоўнае — у глыбіні. І вы, людзі, недалёкія ад урада (а некаторыя працавалі ў гэтых пасадах, хай не на першых ролях, але фактычна ва ўрадзе), разумееце, што не можа быць ніякіх рознагалоссяў і розначытанняў у правядзенні курсу развіцця нашай краін" , — заявіў беларускі лідар.

Аляксандр Лукашэнка заўважыў, што Беларусь узяла пэўны курс, які  быў абвешчаны ў прадвыбарнай кампаніі. І за гэта людзі галасавалі. “Тое, што мы людзям абяцалі, а ўрад быў створаны менавіта пад гэты курс, той курс павінен і правадзіцца. І галоўнае ў нашай палітыцы — народ. Гэта ніякі не папулізм. Я заўсёды гэтак казаў і кажу. У адваротным выпадку нам у гэтай краіне рабіць няма чаго. Людзі — гэта галоўнае. Дысцыпліна, прыстойнасць, згуртаванасць, сістэма ўлады, жорсткасць яе, нацэленая на дысцыпліну і прафесіяналізм,— гэта фактар ​​незалежнасці нашай краіны”, — сказаў Прэзідэнт.

Марыя ДАДАЛКА

Фота БЕЛТА

Дадаць каментар

Выбар рэдакцыі

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі. 

Спорт

Цырымонія развітання з Анатолем Капскім прайшла ў «Барысаў-Арэне»

Цырымонія развітання з Анатолем Капскім прайшла ў «Барысаў-Арэне»

Грамадзянская паніхіда працягвалася больш за дзве гадзіны ў "Барысаў-Арэне".

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.