Вы тут

У Маладзечанскім раёне прайшло традыцыйнае свята песні «Ракуцёўскае лета»


29 ліпеня ў музеі-сядзібе Ракуцёўшчына (Маладзечанскі раён) прайшло традыцыйнае свята песні «Ракуцёўскае лета», прысвечанае творчасці Максіма Багдановіча. Яно стала адметным дзякуючы выступленням паэтаў і музыкаў, фестывалю народных рамёстваў і мясцоваму гулянню.


Летам 1911 года Максім Багдановіч наведаў родную Беларусь. Ён здзейсніў вандроўку ў Вільню, каб пабачыць аднадумцаў з газеты “Наша Ніва”. А пасяліўся паэт у фальварку Вацлава Лычкоўскага – дзядзькі братоў Луцкевічаў, які знаходзіўся ў вёсцы Ракуцёўшчына Маладзечанскага раёна. Таму зараз музей-сядзіба Максіма Багдановіча ў Ракуцёўшчыне штогод адзначае свята песні і паэзіі “Ракуцёўскае лета”. Сёлета гэты дзень запомніўся самаробнымі кнігамі вершаў, займальным квэстам і трыццаціградуснай спякотай.

Надвор’е ў гэтым годзе выдалася па-сапраўднаму летнім: вада і марозіва ў харчовай лаўцы разыходзіліся за хвіліны, а крынічка каля дома была самым папулярным месцам. “Канешне, колькасць людзей залежыць і ад надвор’я. У гэтым годзе яно не вельмі спрыяльнае, але апантаным творчасцю паэта гэта не перашкодзіла прыехаць”, – заўважыла адна з музейных наглядчыкаў. І сапраўды, людзей сабралося шмат. Яны хаваліся пад парасонамі, загаралі на траўцы, абліваліся вадой.

“Цікава, калі б з намі сёння быў Максім Багдановіч, як бы ён ратаваўся ад спякоты?” – запытаўся драматург Васіль Дранько-Майсюк. Наўрад ці сядзеў бы пад парасонам. Пясняр чыстае красы хутчэй за ўсё блукаў бы па сцежках і захапляўся прыгажосцю прыроды.

А вось у наведвальнікаў фестываля была магчымасць паўдзельнічаць у квэсце па творчасці Максіма Багдановіча. Каб прайсці яго паспяхова, таксама патрэбна было шмат блукаць, ведаць біяграфію паэта і фатаграфаваць тыя ці іншыя рэчы з побыту беларусаў. Таму, калі бачылі чалавека, які апантана шукае якую гонту, ведалі: ён удзельнічае ў квэсце. 

Улюбёныя ў паэзію і песню назіралі за канцэртнай праграмай, якая ішла на працягу ўсяго свята. Паэты чыталі вершы і Максіма Багдановіча, і свае ўласныя, музыкі спявалі песні на словы песняра. Традыцыйна выступіў ансамбль з вёскі Маркава, які штогод падымае тут настрой. Адзін з хітоў – песня пра маркаўчаначку, якая жыве ў Маладзечанскім раёне. Увогуле, панавала творчая і святочная атмасфера.

“Наведваем фестываль кожны год, – расказала Юлія Ярмалковіч, якая прыйшла на свята разам з дзецьмі.  – У Ракуцёўшчыне жылі і бацькі, і дзядуля з бабуляй, гэта мая радзіма”. 

З натоўпу вылучалася сям’я, апранутая ў адзенне з аднолькавага матэрыялу. “Зараз вельмі модны напрамак Family Look (калі ўся сям’я апранута падобна – заўвага аўт.), – растлумачыла маці Алена Гарэлікава з Маладзечна. – За некалькі дзён сшыла касцюмы з аршанскага льна, вырашылі ў такім убранні прыехаць на беларускае свята”.

Людзі плялі вянкі, набывалі прыгожыя рэчы, гарталі самаробныя кнігі з вершамі песняра. І ўвесь час было адчуванне, што недзе ў натоўпу прамільгнуць непаслухмяныя кучаравыя валасы і прыгожыя яскравыя вочы... Мы хацелі б спаткацца з табой, Максім!

Маргарыта ГАЙДАРЖЫ

Дадаць каментар

Выбар рэдакцыі

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.

Спорт

Настасся Чарняўская: Трэба, каб людзі ведалі: бадмінтон — рэальны спорт

Настасся Чарняўская: Трэба, каб людзі ведалі: бадмінтон — рэальны спорт

Якія задачы ставяцца перад камандай у 2019 годзе і што самае важнае ў бадмінтоне?

Грамадства

Які ўрок лепшы: перакулены або традыцыйны?

Які ўрок лепшы: перакулены або традыцыйны?

Як зрабіць, каб у вучняў загарэліся вочы?

Грамадства

Губернатар Гродзеншчыны - пра перспектыўныя праекты рэгіёна

Губернатар Гродзеншчыны - пра перспектыўныя праекты рэгіёна

Горад-спадарожнік, анкалагічны цэнтр, «вёскі будучыні»...