26 Верасень, серада

Вы тут

Прэзідэнт здзейсніў рабочую паездку ў Магілёўскую вобласць


Стратныя сельгаспрадпрыемствы — балючая тэма для эканомікі краіны. І добра, што цяпер яны не правіла, а ўсё часцей — выключэнне. У Беларусі дастаткова прыкладаў таго, як на малацэ і мясе, іх перапрацоўцы, можна стварыць прыбытковае прадпрыемства. Але, зноў жа такі, не ва ўсіх гэта атрымліваецца. Учора падчас рабочай паездкі Прэзідэнта Аляксандра Лукашэнкі ў Магілёўскую вобласць ішла размова акурат пра будучыню вёскі, жыццё селяніна ў ёй і... прыход інвестара ў сельскую гаспадарку.


Фота БЕЛТА.

Кіраўнік дзяржавы прыгадаў час распаду СССР, калі перад краінай паўстала пытанне: што далей рабіць з вёскай, як яе развіваць? «Тады было прынята рашэнне: трэба брацца за вёску. Вёска — гэта аснова нашай славянскай дзяржаўнасці. Расіі, Украіны, Беларусі... Зараз я пераканаўся ў тым, што вёска — гэта аснова жыцця любой дзяржавы. І нам пашчасціла, што мы ў свой час узяліся за вёску. Тады прынялі рашэнне: па пяцігодках мадэрнізаваць сельскую гаспадарку, а фактычна — ратаваць, аднаўляць. Першыя пяць гадоў мы аднаўлялі, ратавалі. А далей трэба было рухацца наперад», — расказаў беларускі лідар.

У Беларускай ССР было каля 60 найбольш буйных сельгаспрадпрыемстваў, своеасаблівых «маякоў». Адным з іх быў у той час калгас імя Кірава, які знаходзіўся ў вёсках Малыя і Вялікія Славені, дзе зараз працуе аграхолдынг «Купалаўскае». Тады было вырашана тэрмінова ратаваць гэтыя шэсцьдзясят гаспадарак, і менавіта іх вывесці на новую аснову. У перспектыве яны павінны былі стаць прыкладам таго, як трэба развівацца і жыць вёсцы. За першую і другую пяцігодку ў сельскую гаспадарку было ўкладзена каля $40 млрд. Так, былі структурна перабудаваны гаспадаркі, і тады вырашана было ствараць і новыя вытворчасці, і аграгарадкі.

«У сацыялку аграгарадкоў мы ўклаліся. Мною былі зацверджаны сацыяльныя стандарты — пачынаючы ад вулічнага асвятлення і заканчваючы банкаўскімі паслугамі, гандлем, культурай. Не скажу, што паўсюль выдатна: дзе горш, дзе лепш. Але гэтыя стандарты — па медабслугоўванні, адукацыі, дзіцячых садках — выкананы. Мы стварылі аграгарадкі, але адсталі ў вытворчасці. Спачатку — малако і мяса, а пасля ўжо — сацыялка. Але паколькі гэтым дзяржава займалася, мы перш стварылі больш ці менш нармальныя ўмовы для людзей», — адзначыў Аляксандр Лукашэнка.

Па выніках першых пяцігодак сталі забяспечваць краіну прадуктамі харчавання. Да таго ж атрымалася не толькі задаволіць патрэбы ўнутранага рынку, але і пастаўляць прадукты на экспарт. Сума паставак даходзіла да $5 млрд. Паступова ствараліся аграгарадкі, хоць не кожнаму хапала грошай. Тады дапамога ішла і ад аблвыканкамаў, і з рэспубліканскага бюджэту, і ад прыватнікаў, якія бралі асобныя гаспадаркі на свае плечы — і ставілі на ногі. Сельгаспрадпрыемстваў, якія перайшлі ў паслясавецкі час да бізнесменаў, — каля 20 %.

Прайшло каля 15 гадоў, як была прынята праграма мадэрнізацыі вёскі, аграпрамысловага комплексу. І паўстала пытанне: а што далей? «Я не прыхільнік таго, каб прыватызаваць калгасы і саўгасы, але думаю, што на мяне сяляне не пакрыўдзяцца, калі я буду прымаць рашэнне аб прыватызацыі. Гэта значыць, прадаваць: пускаць прыватніка ў сельскую гаспадарку. Не пакрыўдзяцца таму, што дваццаць гадоў я вам даў час: вызначайцеся», — заявіў Аляксандр Лукашэнка. — І тут хто жадае працаваць на зямлі «без пана», скажам так, той мог паспрабаваць гэта зрабіць. А хто не — таго дзяржава на сваіх плячах не можа несці і не павінна», — падкрэсліваў кіраўнік дзяржавы.

«Таму мы не супраць таго, каб сюды прыйшоў прыватны капітал. Але пад жалезныя ўмовы. І мая жалезная ўмова, як чалавека вясковага, — каб тут не быў пакрыўджаны чалавек. Ён павінен прыходзіць на працу, тэхналагічна забяспечваць працэс, атрымліваць дастойную зарплату. Бачыце, я схіляю ўсю краіну, каб сярэдняя зарплата была ў тысячу рублёў. Я думаю, што ў будучым годзе перад губернатарамі будзе стаяць, бо яны перш за ўсё адказваюць за сяло, задача не 600, а 800 рублёў (сярэдняя зарплата ў сельскай гаспадарцы. — Зв.). А праз некалькі гадоў павінны да тысячы рублёў падысці і ў сельскай гаспадарцы», — сарыентаваў беларускі лідар. Пры гэтым ён падкрэсліў, што дастойную зарплату варта плаціць сапраўды эфектыўным і адказным супрацоўнікам. А ў найлепшых гаспадарках краіны такі сярэдні заробак ужо ёсць. А значыць, гэта дасяжная лічба.

Падчас рабочай паездкі кіраўнік дзяржавы наведаў арганізацыі, якія ўваходзяць у аграхолдынг «Купалаўскае», а затым правёў нараду ў Шклоўскім раёне, на тэрыторыі якога размешчана сельгаспрадпрыемства. Аляксандра Лукашэнку перш за ўсё цікавілі праблемы, з якімі сутыкаецца аграхолдынг і раён у прыватнасці, а таксама вобласць у цэлым. На думку памочніка Прэзідэнта — інспектара па Магілёўскай вобласці Генадзя Лаўранкова, адна з ключавых праблем — несуаднясенне рэальных эканамічных вынікаў сельгаспрадпрыемстваў і выплачаных зарплат. Калі б заробак напрамую залежаў ад эфектыўнасці работы, то не было б такіх праблем, як нізкі ўзровень адказнасці, дэфіцыт кадраў і спецыялістаў. «Трэба не толькі атрымаць, але і прадаць высакаякасную прадукцыю. Гэта патрабуе змены свядомасці спецыялістаў. Трэба паказаць, што можна і трэба зарабляць грошы. Тады вымалюецца і тэхналогія, і ўсё астатняе. Над кожным не паставіш наглядчыка, каб усе рабілі па тэхналогіі», — не паспрачаешся з памочнікам Прэзідэнта. Але для таго каб выбудаваць сістэму эканамічных узаемаадносін у гаспадарцы, як гэта не дзіўна, патрэбны менавіта псіхалагічныя змены.

У адказ Прэзідэнт падкрэсліў, што тэхналогія — гэта дыктатура. За выкананне тэхналогіі ў выніку і плацяць зарплату, а не даюць яе наперад. «За парушэнне тэхналогіі ў асобных краінах у турму садзяць. Я ўжо не кажу пра тое, што ўласнік прадпрыемства не будзе трымаць гэтага чалавека ні аднаго дня. Мы не ў савецкія часы жывём, калі збіраліся на пленуме і адзін аднаго ўгаворвалі... Цяпер па-іншаму ва ўсім свеце. Але ўсё павінна быць справядліва. Чалавека нельга прыніжаць і караць ні за што. Праўда, у нас кіраўнікі не ўсе гэта разумеюць. Караць трэба за справу — дрэнную працу, невыкананне тэхналогій, не дай бог, супрацьпраўныя дзеянні. Павінна быць жалезная дысцыпліна», — паставіў задачу Аляксандр Лукашэнка.

Падчас нарады таксама абмяркоўваліся стан і будучыня аграхолдынга «Купалаўскае», эканамічная сітуацыя ў Шклоўскім раёне і асобна — у Магілёўскай вобласці. Таксама гаворка ішла і пра кадравую палітыку ў гаспадарках, якасць вырабляемага малака, жыллё для супрацоўнікаў сельгаспрадпрыемстваў, стварэнне замкнёных цыклаў вытворчасці мяса-малочнай прадукцыі.

Вераніка ПУСТАВІТ,

а/г Малыя Славені, Шклоўскі раён, Магілёўская вобласць

Загаловак у газеце: Вёска, чым будзеш жыць?

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.