Вы тут

Самалёт у мінулае


Музей у самалёце АН-26, які адлятаў свой тэрмін, — нагода пабываць у ваенным гарадку Мачулішчы, што недалёка ад Мінска. Зразумела, на тэрыторыю вайсковага падраздзялення проста так не трапіш, таму для ахвотных тут прадугледжана магчымасць арганізаванага наведвання музея па папярэдняй дамоўленасці.


Мне пашанцавала: у маім выпадку экскурсію па самалёце-музеі праводзіў знаўца ваеннай гісторыі і тэхнікі — намеснік камандзіра эскадрыллі падпалкоўнік Андрэй Пучко. Ён паведаў пра баявы шлях падраздзялення, пра экспанаты музея — дакументы і асабістыя рэчы авіятараў, узоры ўзбраення, узнагароды тых, хто вызначыўся у баявых аперацыях і пры ліквідацыі наступстваў аварыі на Чарнобыльскай АЭС. Амаль пад крыламі самалёта-музея пралегла алея Герояў, дзе на мармуры ўвекавечаны імёны аднапалчан.

А яшчэ пашчасціла пазнаёміцца з цікавым чалавекам. Пажылы мужчына ў цывільным уважліва слухаў нашага экскурсавода, часам уступаючы з ім у дыялог. Гэта быў палкоўнік запасу Ігар Арабей. Уражвала яго веданне армейскага жыцця, манера лаканічна і сцісла выказваць думку. Аказалася, што Ігар Арабей у мінулым прымаў удзел у ваенных аперацыях далёка ад Радзімы. Падчас аднаго з баёў быў цяжка паранены.

— Перавозілі мяне ў шпіталь на Радзіму вось на такім самым самалёце АН-26, — расказаў мой субяседнік. — Хто ведае, можа гэта і ёсць той жа самы мой ратавальнік?

Той ці не — высветліць нам не ўдалося. З таго бою мінула амаль палова стагоддзя, ваенная тэхніка, як і самі вайскоўцы, за гэты час не аднойчы мяняла месца свайго знаходжання. Ігар сёння на пенсіі, але без справы не сядзіць — кіруе музеем памяці воінаў-інтэрнацыяналістаў у маладзечанскай школе № 14.

Сталую прапіску атрымаў у ваенным гарадку былы баявы лайнер АН-26. Пасля свайго апошняга прызямлення самалёт стаў музеем — надзейна захоўвае ў пераабсталяваным салоне памяць пра вайскоўцаў, якія служылі ў падраздзяленні і памнажалі яго баявую славу.

Непадалёку пабудаваны храм Святога прарока Ільі ў памяць пра воінаў-авіятараў.

Пра гісторыю падраздзялення расказвае падпалкоўнік Андрэй Пучко.

Ігар Арабей у кабіне самалёта АН-26.

Алея Герояў побач з самалётам-музеем.

У салоне самалёта шмат экспанатаў — сведак мінулых баёў.

Яўген ПЯСЕЦКІ, фота аўтара

Дадаць каментар

Выбар рэдакцыі

Грамадства

Школа заўтрашняга дня. У трэндзе — медыянавыкі, гейміфікацыя і сторытэлінг

Школа заўтрашняга дня. У трэндзе — медыянавыкі, гейміфікацыя і сторытэлінг

У мінулыя выхадныя сталічны бізнес-клуб «Імагуру» ўжо другі раз прымаў на сваіх плошчах педагагічную неканферэнцыю. 

Культура

Гісторыкі спадзяюцца знайсці дакладную дату заснавання Мірскага замка

Гісторыкі спадзяюцца знайсці дакладную дату заснавання Мірскага замка

Вызначыць дакладны час з'яўлення на Беларусі вядомага абарончага збудавання дагэтуль немагчыма, хоць розных гіпотэз існуе шмат.

Грамадства

«Ніколі не губляйце мару дзяцінства!»

«Ніколі не губляйце мару дзяцінства!»

Мы з Аленай Варановіч пазнаёміліся выпадкова, на вуліцы. Адразу разгаварыліся і знайшлі агульную мову. Тады за кубкам кавы яна сказала мне важныя словы: «Ніколі не губляй мару дзяцінства».

Спорт

Уладзімір Шантаровіч: Кажуць, я — геній, і мне гэта вельмі не падабаецца

Уладзімір Шантаровіч: Кажуць, я — геній, і мне гэта вельмі не падабаецца

Як трэнер пабудаваў сістэму, якая выхоўвае алімпійскіх чэмпіёнаў.