Вы тут

Гід па модных тэндэнцыях лета


Лета — гэта маленькае жыццё. Дызайнеры прапануюць правесці яго ярка і дзёрзка. У чым сустракаць лета? Расказваем пра галоўныя тэндэнцыі сезона. Калі вам падалося, што вы некалі гэта ўжо бачылі, вам не падалося: мода 1980-х і 1990-х гадоў вяртаецца.


Джынсоўка — адна з самых модных куртак сезона.

Фасоны: штаны-ка́рга і вятроўка

Галоўны прадмет летняга гардэробу — сукенка. У гэтым сезоне на піку папулярнасці мадэлі з валанамі, аголенымі плячыма, махрамі. Актуальнымі будуць таксама шаўковыя і атласныя сукенкі, але, калі вы не ўладальніца ідэальнай фігуры, не рызыкуйце: гэты матэрыял не церпіць хібаў.

Звязана гэта з выхадам фільма «Лара Крофт» ці не, але ў моду вяртаюцца штаны-ка́рга. У 1930-я гады такія насілі брытанскія салдаты, а цяпер у штанах колеру хакі з накладнымі бакавымі кішэнямі жанчынам прапануюць хадзіць і на работу, і на сустрэчу з сябрамі. Дапоўніць вобраз можна белай кашуляй ці аднатонным пуловерам.

Калі думаеце, якую куртку лепш набыць на лета, то падказваем: прыглядзіцеся да джынсавай. Ідэальная джынсоўка павінна быць памеру «аверсайз» (то-бок крыху большай, чым патрэбна для вашай фігуры). «Вараны» дэнім і рознакаляровыя нашыўкі (вось вам і спосаб абнавіць ці падрамантаваць старую рэч) толькі вітаюцца.

Другі модны варыянт верхняга адзення — вятроўка. Спартыўны стыль не страчвае актуальнасці і гэтым летам, таму не бойцеся насіць такія рэчы па-за межамі стадыёна. Спалучаць вятроўку можна хоць са штанамі, хоць з сукенкай. Адным словам, эксперыментуйце.

Прынты: ад гароху да кракадзіла

Кветкавы ўзор, бадай, ніколі не выйдзе з моды. Калі хочацца стварыць рамантычны вобраз, сукенка ці кашуля ў кветкі — тое што трэба. Хоць такі прынт цікава глядзіцца і на касцюмах са штанамі. Памятайце правіла: буйны ўзор дадае фігуры дадатковага аб'ёму, а таму падыдзе не кожнаму.

Яшчэ адзін актуальны прынт лета — гарох. Гэтым разам — у класічнай чорна-белай камбінацыі. Да «гарохавай» кашулі лепш падбіраць аднатонныя штаны ці джынсы, каб выглядаць гарманічна і стрымана.

Яркім асобам раім прыглядзецца да драпежнага прынта. Гэта не толькі леапард, цяпер папулярныя малюнкі а-ля скура пітона ці кракадзіла. Прычым неабавязкова ў прыроднай гаме — дызайнеры сумяшчаюць узоры з яркімі колерамі.

Буйныя лагатыпы на адзенні яшчэ некалькі сезонаў таму лічыліся маветонам. Але не сёння. Надпісы брэндаў зноў сталі жаданым дэкорам. Адзінае «але»: калі ваш «Дыёр» набыты на рынку, не варта ім казыраць.

Колеры: таматы супраць канарэек

Пра галоўны колер сезона — ультрафіялетавы — мы ўжо пісалі раней. На што яшчэ звярнуць увагу? Напрыклад, на адценні чырвонага. Інстытут колеру Pantone раіць выбраць насычаны таматны і чырвона-карычневы тоны. Першы можна спалучаць з малочным белым, сінім, залатым, нюдавым (цялесным). Другі добра глядзіцца з чорным, цёмна-ружовым і бардовым.

У хіт-парадзе модных колераў аказаўся таксама канарэечны. Такое адценне лепш насіць з чорным або ў кампаніі ружовага і белага. Калі жоўтая сукенка для вас занадта яркая, вазьміце туфлі ці сумачку канарэечнага тону.

Актуальныя пастэльныя колеры. Напрыклад, лавандавы і персікавы. Яны прыдадуць вобразу лёгкасці і мяккасці.

Кветкавы прынт для рамантычных асоб.

Абутак: масіўныя красоўкі і міні-шпількі

Памятаеце, некалі ўсе насілі туфлі на нізкіх абцасах-чарках? Калі на дальніх паліцах вашай шафы такія захаваліся, даставайце і смела надзявайце зноў. На захадзе такі абцас, дарэчы, называюць kіtten heel, што ў перакладзе значыць «абцас-кацяня». Іх некалі прыдумалі амерыканскія дызайнеры для маленькіх лэдзі, якія хацелі туфлі, як у мам. У выніку зручную альтэрнатыву высокім шпількам упадабалі многія жанчыны (сярод іх была, напрыклад, актрыса Одры Хепбёрн).

У модзе таксама «пачварныя» красоўкі — у народзе іх так празвалі за буйную і дзіўную форму. Гіганцкія красоўкі на тоўстай падэшве прэзентавалі на паказах такія вядомыя брэнды, як Balencіaga, Luі Vuіtton, Guccі, Stella McCartney. Чым яны спадабаліся публіцы, застаецца загадкай (модныя аналітыкі кажуць, справа ў тым, што людзі цяпер хочуць выглядаць не прыгожа, а незвычайна). Насіць такі абутак прапануюць пад што хочаце: джынсы, сукенкі, строгія касцюмы.

Гэтым летам актуальныя будуць басаножкі са скуры «пад змяю», з устойлівымі празрыстымі абцасамі, шматлікімі раменьчыкамі і махрамі. А яшчэ мюлі — туфлі без заднікаў. Яны добра ўпішуцца ў паўсядзённы стыль адзення.

Правіла «ніякіх калготак пад басаножкі» ў гэтым сезоне ніхто не захоўвае. Наадварот — на подыуме мадэлі надзявалі пад адкрыты абутак рознакаляровыя шкарпэткі. Прытрымлівацца новага веяння не заклікаем, але, калі ўбачыце падобнае на вуліцах горада, не асуджайце — модным быць не забароніш.

Сумкі: ад пластыкавых да саламяных

Хіт лета — плеценыя сумкі. З саломы, скуры, пластыку... Асабліва цікава глядзяцца плеценыя мадэлі круглай формы.

Адным з галоўных матэрыялаў гэтага сезона стаў пластык, а таму ў модзе празрыстыя пластыкавыя сумкі. У такой лёгка знайсці патрэбныя рэчы. А для тых, хто не хоча выстаўляць жыццё напаказ, дызайнеры прапануюць наступны варыянт: скласці ўсё ў меншую сумку і закінуць яе ў аб'ёмную празрыстую.

Яшчэ адзін модны фасон — сумка-кісет. Упішацца і ў офісны, і ў спартыўны вобраз. Нягледзячы на невялікі памер, мадэль даволі ўмяшчальная.

Аксесуары: бейсболка і акуляры з «Матрыцы»

Бадай, галоўны галаўны ўбор гэтага лета — бейсболка. Не думайце, што іх могуць насіць толькі падлеткі. Бейсболкі добра дапоўняць як спартыўны, так і паўсядзённы вобраз. Калі не ведаеце, якую выбраць, спыніцеся на джынсавай — дэнім як ніколі актуальны.

У модзе павязкі на галаву. Стыльная падказка: завязаныя канцы павінны не хавацца пад валасамі, а быць навідавоку. Такі штрых дадасць вобразу лёгкасці і гуллівасці.

Па-ранейшаму папулярныя масіўныя ўпрыгажэнні. Напрыклад, завушніцы-кольцы. Яны могуць быць двухузроўневымі, дэкарыраванымі камянямі ці пацеркамі. Папулярныя таксама даўгія завушніцы-падвескі, парныя бранзалеты (іх прапануюць насіць як на запясці, так і на перадплеччы).

Самыя модныя акуляры лета — вузкія трохвугольныя. Такія, як на Томе Крузе ў фільме «Місія невыканальная» ці на галоўных героях «Матрыцы». Мы ж казалі, што тэндэнцыі 1990-х вяртаюцца. Футурыстычныя акуляры можна насіць як са спартыўнымі, так і з мінімалістычнымі рэчамі. У любым выпадку такі аксесуар асвяжыць вобраз і абавязкова прыцягне да вас увагу.

Наталля ЛУБНЕЎСКАЯ

Загаловак у газеце: Галоўнае — выглядаць незвычайна

Дадаць каментар

Выбар рэдакцыі

Грамадства

Школа заўтрашняга дня. У трэндзе — медыянавыкі, гейміфікацыя і сторытэлінг

Школа заўтрашняга дня. У трэндзе — медыянавыкі, гейміфікацыя і сторытэлінг

У мінулыя выхадныя сталічны бізнес-клуб «Імагуру» ўжо другі раз прымаў на сваіх плошчах педагагічную неканферэнцыю. 

Культура

Гісторыкі спадзяюцца знайсці дакладную дату заснавання Мірскага замка

Гісторыкі спадзяюцца знайсці дакладную дату заснавання Мірскага замка

Вызначыць дакладны час з'яўлення на Беларусі вядомага абарончага збудавання дагэтуль немагчыма, хоць розных гіпотэз існуе шмат.

Грамадства

«Ніколі не губляйце мару дзяцінства!»

«Ніколі не губляйце мару дзяцінства!»

Мы з Аленай Варановіч пазнаёміліся выпадкова, на вуліцы. Адразу разгаварыліся і знайшлі агульную мову. Тады за кубкам кавы яна сказала мне важныя словы: «Ніколі не губляй мару дзяцінства».

Спорт

Уладзімір Шантаровіч: Кажуць, я — геній, і мне гэта вельмі не падабаецца

Уладзімір Шантаровіч: Кажуць, я — геній, і мне гэта вельмі не падабаецца

Як трэнер пабудаваў сістэму, якая выхоўвае алімпійскіх чэмпіёнаў.