Вы тут

У НАН Беларусі пройдзе Міжнародны форум даследчыкаў беларускай казкі


17—18 мая ў Нацыянальнай акадэміі навук Беларусі адбудзецца Міжнародны форум даследчыкаў беларускай казкі. У межах маштабнага мерапрыемства пройдуць навуковая канферэнцыя, круглы стол, выступленні майстроў казачнага жанру. Арганізатарам форуму з'яўляецца Цэнтр даследаванняў беларускай культуры, мовы і літаратуры Нацыянальнай акадэміі навук Беларусі.


Казачны эпас — найбуйнейшы здабытак беларускай нацыянальнай культуры, які і сёння захоўвае сваё эстэтычнае, пазнавальнае і выхаваўчае значэнні. Беларускія казкі трывала ўбудаваныя ў сусветную казачную скарбніцу, але пры гэтым характарызуюцца пэўнымі асаблівасцямі на розных узроўнях — сюжэтна-вобразнымі, матыўнымі. Таксама вылучаюцца яны і мовай, якая тут набывае асаблівы каларыт і выразнасць.

Развіццё пісьмовай беларускай культуры, натуральна, прывяло да ўзнікнення і пашырэння аўтарскіх казак. Традыцыі казачнай літаратуры ў жыцці беларускага народа вельмі моцныя і трывалыя. Гэта адзін са складнікаў нацыятварэння беларусаў. І ўсё ж сучасныя цывілізацыйныя працэсы адсоўваюць казку на перыферыю прыгожага пісьменства. Таму ёсць патрэба акцэнтаваць важнасць мастацтва казкі для грамадства і для кожнай асобы.

Мерапрыемствы форуму адкрытыя. 17 мая ў 10.30 пройдзе пленарнае пасяджэнне (вул. Сурганава, 1, корп. 2, актавая зала на другім паверсе), яму будзе папярэднічаць канцэрт, які пачнецца ў 10.00. У 14.00 выступяць майстры казачнага жанру, носьбіты традыцыі Соф'я Каток з вёскі Пласток Любанскага раёна, Людміла Глухатарэнка з вёскі Санюкі Ельскага раёна, Аляксандр Галкоўскі з вёскі Судзілы Клімавіцкага раёна. Выступяць таксама пераймальнікі традыцыі. Пройдзе прэзентацыя фальклорнага зборніка тэкстаў з Любанскага раёна «Казка з быллю напалову». На працягу дня будзе працаваць выстаўка дзіцячых малюнкаў.

18 мая з 9.00 да 17.00 пройдуць пасяджэнні секцый канферэнцыі «Народная казачная проза ў еўрапейскай прасторы: архаічная традыцыя vs сучасная інтэрпрэтацыя».

У форуме возьмуць удзел вядучыя даследчыкі казачнага эпасу з Беларусі, Эстоніі, Расіі, Украіны і Балгарыі, сярод якіх прэзідэнт Акадэміі навук Абхазіі Зураб Джапуа з дакладам «Асноўныя персанажы абхазскіх казак пра жывёл», кіраўніца сектара «Балканская этналогія» Балгарскай акадэміі навук Кацярына Анастасава з дакладам «Беларуская казка ў Балгарыі», загадчыца аддзела нематэрыяльнай культурнай спадчыны Дзяржаўнага Расійскага Дома народнай творчасці Варвара Дабравольская з дакладам «Рускія казачнікі ў XXІ стагоддзі», загадчыца навукова-адукацыйнай лабараторыі рэгіянальных філалагічных даследаванняў Пскоўскага дзяржаўнага ўніверсітэта Наталля Бальшакова з дакладам «Пскоўская казка ў кантэксце тэмы дзяцінства ў традыцыйнай культуры».

У канцы мерапрыемства ўдзельнікі і госці будуць мець магчымасць пазнаёміцца з «Калыханкай» — найстарэйшай штодзённай вечаровай дзіцячай перадачай на Беларускім тэлебачанні, першы выпуск якой пабачыў свет у студзені 1981 года.

Загаловак у газеце: Справы казачныя

Дадаць каментар

Выбар рэдакцыі

Грамадства

Школа заўтрашняга дня. У трэндзе — медыянавыкі, гейміфікацыя і сторытэлінг

Школа заўтрашняга дня. У трэндзе — медыянавыкі, гейміфікацыя і сторытэлінг

У мінулыя выхадныя сталічны бізнес-клуб «Імагуру» ўжо другі раз прымаў на сваіх плошчах педагагічную неканферэнцыю. 

Культура

Гісторыкі спадзяюцца знайсці дакладную дату заснавання Мірскага замка

Гісторыкі спадзяюцца знайсці дакладную дату заснавання Мірскага замка

Вызначыць дакладны час з'яўлення на Беларусі вядомага абарончага збудавання дагэтуль немагчыма, хоць розных гіпотэз існуе шмат.

Спорт

Уладзімір Шантаровіч: Кажуць, я — геній, і мне гэта вельмі не падабаецца

Уладзімір Шантаровіч: Кажуць, я — геній, і мне гэта вельмі не падабаецца

Як трэнер пабудаваў сістэму, якая выхоўвае алімпійскіх чэмпіёнаў.

Грамадства

Як дзяўчаты з асаблівасцямі развіцця ўпершыню ствараюць модную калекцыю

Як дзяўчаты з асаблівасцямі развіцця ўпершыню ствараюць модную калекцыю

У лістападзе ў Мінску пройдзе Беларускі тыдзень моды.