Вы тут

Формула Малдовы


Учора самалёт Прэзідэнта Аляксандра Лукашэнкі прызямліўся ў Кішынёве — сталіцы Малдовы. Большасць часу першага дня афіцыйнага візіту кіраўніка дзяржавы ў гэту краіну пайшла на перагаворы з яе Прэзідэнтам у пашыраным складзе і сам-насам. Галоўнай тэмай сталі кірункі выгаднага для абодвух бакоў эканамічнага супрацоўніцтва.


Сустрэчы папярэднічаў падарунак малдаўскаму боку ад беларускага: на бязвыплатнай аснове будуць перададзены пяць трактароў МТЗ-82 і дзве камунальныя машыны МАЗ. Адпаведны ўказ кіраўнік беларускай дзяржавы падпісаў напярэдадні. Такое рашэнне накіравана на ўмацаванне беларуска-малдаўскага супрацоўніцтва і далейшае развіццё адносін. Тэхніка прыбудзе ў Малдову ў самы бліжэйшы час.

Падчас перагавораў з Прэзідэнтам Малдовы Ігарам Дадонам Аляксандр Лукашэнка расказаў, што, наведваючы былыя рэспублікі Савецкага Саюза, нідзе не адчувае такой настальгіі, як у Малдове: «Праязджаючы па цэнтральнай вуліцы Кішынёва, я больш за ўсё хацеў бы прайсці па ёй пешшу, як калісьці было ў савецкія часы. Я прызнаюся шчыра (гэта не для піяру нейкага, таму што я ў Малдове): лепшай зямлі я не бачыў і не сустракаў. Тут добрыя людзі, зямля, вельмі добры клімат».

Што да эканамічнага супрацоўніцтва, то Малдова зацікаўлена пераняць вопыт Беларусі ў сельскай гаспадарцы, прамысловасці і сацыяльнай сферы. Пра гэта заявіў Ігар Дадон: «Для большасці грамадзян Малдовы тое, што адбываецца ў Беларусі, вельмі цікава. Не буду скрываць: яны хацелі жыць не горш, чым у Беларусі. У вас вельмі дынамічна развіваецца краіна, і нам цікава пераняць вопыт у розных сегментах: і ў сельскай гаспадарцы, і ў прамысловасці, і ў сацыяльнай сферы ў вас вельмі шмат праектаў».

У сваю чаргу Аляксандр Лукашэнка падкрэсліў важнасць дружалюбных адносін з Малдовай. «Мы нямала зрабілі ў былыя часы і асабліва цяпер. Вы вырабляеце тое, чаго няма ў Беларусі. Мы родныя людзі (я гэтага ніколі не забываю і не забуду), ды і вам, якія б у вас ні былі палітычныя перавагі, беларусы — не чужыя людзі. У нас няма ніякіх геапалітычных, стратэгічных інтарэсаў тут, акрамя дружалюбных. Улічваючы тое, што мы блізкія людзі, і тое, што вы вырабляеце патрэбнае нам, мы купім у вас. А мы вырабляем тое, што трэба вам», — сказаў Прэзідэнт Беларусі.

Беларускі бок гатовы не толькі гандляваць, але і ствараць сумесныя прадпрыемствы. У супрацоўніцтве нам нічога не перашкаджае, лічыць Прэзідэнт. Пры гэтым Беларусь гатова дапамагаць Малдове і ў падрыхтоўцы кваліфікаваных кадраў.

Кіраўнік беларускай дзяржавы дадаў, што ёсць шмат размоў пра арыентацыю Малдовы на Еўрапейскі саюз ці, наадварот, на Усход. І многія краіны не ведаюць, як развіваць супрацоўніцтва з ёй. «Трэба бачыць Малдову такой, якая яна ёсць. Мы такім прынцыпам і кіруемся», — выказаў сваю думку Аляксандр Лукашэнка. Ён лічыць, што невялікія дзяржавы павінны самі арыентавацца, з кім ім супрацоўнічаць. «Я формулу Прэзідэнта Малдовы прымаю на ўра: мы павінны бачыць усё добрае і там, і там», — падкрэсліў беларускі лідар.

Ігар Дадон паведаміў, што Малдова разлічвае на адкрыццё авіярэйса Мінск — Кішынёў у найбліжэйшы час. Ён адзначыў, што Беларусь уваходзіць у дзясятку камерцыйных партнёраў яго краіны. У дзвюх краін ужо існуюць сумесныя прадпрыемствы па зборцы трактароў і тралейбусаў. «Спадзяюся, што мы будзем неўзабаве  збіраць і аўтобусы», — сказаў Прэзідэнт Малдовы. Перспектыўным Ігар Дадон лічыць і ўдзел беларускіх кампаній у інфраструктурных праектах, у тым ліку ў будаўніцтве дарог, бо беларускія дарогі па якасці адны з самых лепшых у свеце.

Візіт працягваецца. Сёння адбудуцца перагаворы з прэм'ер-міністрам Малдовы Паўлам Філіпам.

Вераніка ПУСТАВІТ

Дадаць каментар

Выбар рэдакцыі

Грамадства

Школа заўтрашняга дня. У трэндзе — медыянавыкі, гейміфікацыя і сторытэлінг

Школа заўтрашняга дня. У трэндзе — медыянавыкі, гейміфікацыя і сторытэлінг

У мінулыя выхадныя сталічны бізнес-клуб «Імагуру» ўжо другі раз прымаў на сваіх плошчах педагагічную неканферэнцыю. 

Культура

Гісторыкі спадзяюцца знайсці дакладную дату заснавання Мірскага замка

Гісторыкі спадзяюцца знайсці дакладную дату заснавання Мірскага замка

Вызначыць дакладны час з'яўлення на Беларусі вядомага абарончага збудавання дагэтуль немагчыма, хоць розных гіпотэз існуе шмат.

Спорт

Уладзімір Шантаровіч: Кажуць, я — геній, і мне гэта вельмі не падабаецца

Уладзімір Шантаровіч: Кажуць, я — геній, і мне гэта вельмі не падабаецца

Як трэнер пабудаваў сістэму, якая выхоўвае алімпійскіх чэмпіёнаў.

Грамадства

Як дзяўчаты з асаблівасцямі развіцця ўпершыню ствараюць модную калекцыю

Як дзяўчаты з асаблівасцямі развіцця ўпершыню ствараюць модную калекцыю

У лістападзе ў Мінску пройдзе Беларускі тыдзень моды.