24 Люты, субота

Вы тут

Як найбліжэйшая пяцігодка зменіць сельскагаспадарчую галіну?


Сельская гаспадарка для Беларусі — адна з найбольш важных даходных пазіцый для бюджэту. Пад брэндам «зроблена ў Беларусі» вырабляюцца разнастайныя малочныя і мясныя вырабы, якія асацыююцца ў спажыўцоў з высокай якасцю. Таксама ў СНД пастаўляецца самая свежая агародніна і садавіна. У краіне практычна цалкам замяшчаецца імпарт, а таксама штогод павялічваюцца экспартныя паказчыкі. Толькі сёлета, паводле інфармацыі Міністэрства сельскай гаспадаркі і харчавання, экспарт галіны ў перыяд са студзеня па жнівень дасягнуў узроўню 1,64 млрд долараў — 112,1% да адпаведнага ўзроўню 2016 года. Сёння стаіць задача нарасціць экспарт прадукцыі не менш, чым на 11,5%. Праца над пастаўкамі, нарошчванне аб'ёмаў вырабленай прадукцыі патрабуюць асаблівай увагі да мадэрнізацыі і інавацый.


Фота БЕЛТА

Павышаем ураджайнасць

Міністр сельскай гаспадаркі і харчавання Леанід Заяц адзначае, што ў гэтай пяцігодцы развіццё аграпрамысловага комплексу забяспечваецца ў адпаведнасці з Дзяржаўнай праграмай развіцця аграрнага бізнесу на 2016—2020 гады. У рамках дзяржпраграмы ажыццяўляецца рэалізацыя 11 падпраграм, якія прадугледжваюць развіццё вытворчасці і рэалізацыі раслінаводчай і жывёлагадоўчай прадукцыі, а таксама селекцыі і насенняводства, племянной справы ў жывёлагадоўлі. Таксама запланавана падтрымка малых формаў гаспадарання, тэхнічная і тэхналагічная мадэрнізацыя, развіццё меліярацыі сельскагаспадарчых зямель.

У раслінаводстве прадугледжваецца пільна сачыць за павышэннем глебавай урадлівасці. Таксама ідзе работа па дасягненні максімальнай акупнасці ўраджаю. Для галіны стратэгічна важна забяспечыць і пагалоўе буйной рагатай жывёлы высокаэнергетычнымі, збалансаванымі кармамі.

У выніку да канца 2020 года плануецца павысіць ураджайнасць збожжавых культур на 9% да ўзроўню 2015 года, бульбы — на 25%, агародніны — на 9%, пладоў і ягад — у 2,5 раза, рапсу — на 31%, цукровых буракоў — на 51%. Акрамя таго, павялічыць вытворчасць прадукцыі раслінаводства ў гаспадарках усіх катэгорый на 9,3% да ўзроўню 2015 года.

Зараз у краіне таксама працуюць над пытаннем укаранення прынцыпаў арганічнага земляробства. Дарэчы, адпаведны закон плануецца ўнесці ў парламент да канца года. Згодна з ім дзяржава будзе аказваць падтрымку тым суб'ектам гаспадарання, якія накіраваны на развіццё такога віду земляробства. Леанід Заяц лічыць, што земляробства ў Беларусі павінна быць экалагічна інтэнсіўнае, гарантаваць харчовую бяспеку, і ахову навакольнага асяроддзя. Для гэтага і патрэбны адпаведны дакумент, у якім будзе вызначана паняцце арганічнай вытворчасці, а таксама агульныя патрабаванні да вытворчасці і абарачэння арганічнай прадукцыі.

Фота Анатоля КЛЕШЧУКА

Робаты і каровы

Для жывёлагадоўлі на перыяд дзеяння праграмы па аграрным бізнесе таксама вызначаны прыярытэтныя напрамкі. Плануецца шырокае ўкараненне рэсурсазберагальных тэхналогій, якія пазітыўна паўплываюць на вытворчасць прадукцыі за кошт скарачэння матэрыяльных і працоўных выдаткаў, і, як вынік — на зніжэнне сабекошту. Плануецца павышэнне ўзроўню аховы краіны — а менавіта ў плане біялагічнай бяспекі сельскагаспадарчых жывёл, экалогіі навакольнага асяроддзя, бяспекі прадуктаў харчавання насельніцтва. Планы напалеонаўскія. У выніку да 2020 года вытворчасць прадукцыі жывёлагадоўлі ў гаспадарках усіх катэгорый будзе павялічана на 18,3% да ўзроўню 2015 года. Запланаваныя аб'ёмы вытворчасці сельскагаспадарчай прадукцыі дадуць магчымасць да 2020 года цалкам забяспечыць патрэбы ўнутранага рынку ў асноўных відах плодаагародніннай, мяса-малочнай прадукцыі, хлебабулачных, мукамольна-крупяных вырабаў.

Станоўчыя тэндэнцыі можна адчуць ужо і ў гэтым годзе. «Па выніках працы за дзесяць месяцаў у аграпрамысловым комплексе назіраецца станоўчая дынаміка развіцця. Тэмп росту вытворчасці прадукцыі сельскай гаспадаркі ва ўсіх катэгорыях склаў 102,9%, у сельгасарганізацыях — 103,8%. Па выніках года мы забяспечым рост вытворчасці сельгаспрадукцыі на ўзроўні 3%», — сказаў Леанід Заяц. Міністр звярнуў увагу на тое, што ў краіне ёсць значныя рэзервы для павышэння эканамічнай эфектыўнасці сельскай гаспадаркі. «У прыярытэце завяршыць будаўніцтва свінатаварных комплексаў у Гродзенскай, Магілёўскай, Віцебскай, Мінскай абласцях. Акрамя таго, у ступені гатоўнасці 50% і вышэй знаходзяцца 128 малочнатаварных фермаў», — падкрэсліў ён.

Генетыка малочнай жывёлагадоўлі краіны сёння на высокім узроўні. Важная задача — раскрыць увесь яе патэнцыял. «Гэтым сёння і займаюцца нашы навукоўцы. Мы паляпшаем пародны патэнцыял. У нас ёсць элітнае ядро кароў, якія размешчаны ў найлепшых гаспадарках. Створана піраміда племянной справы. Там мы хутка сканцэнтруем найлепшы сусветны генетычны патэнцыял. Кожны год племянное ядро будзе толькі пашырацца», — растлумачыў міністр.

Таксама, па яго словах, будзе пашырацца і тэхнічны патэнцыял для жывёлагадоўлі. У Беларусі ёсць сучасныя даільныя залы і тэхналогіі. Больш за 50 фермаў ужо рабатызаваныя.

Акрамя таго, выпрабавальная база новых магчымасцяў беларускіх тэхналогій створана на Сахаліне. «Там пабудаваны малочнатаварны комплекс па беларускай тэхналогіі на тысячу галоў. У наступным годзе мы туды паставім сваю жывёлу і забяспечым суправаджэнне тэхналогіі», — растлумачыў Леанід Заяц.

Мадэрнізацыя ў пашане

Міністэрства працуе над паляпшэннем вытворчасці і павышэннем якасці прадукцыі. Асноўныя напрамкі — павышэнне ўзроўню перапрацоўкі сельскагаспадарчай сыравіны, вытворчасць прадукцыі высокай якасці, запатрабаванай на ўнутраным і знешнім рынках. З гэтай мэтай пастаянна праводзіцца работа па тэхніка-тэхналагічным забеспячэнні цэхаў, мадэрнізацыі халадзільнай гаспадаркі, стварэнні сучасных упаковачных ліній, сертыфікацыі, укараненні сістэмы менеджменту бяспекі харчовых прадуктаў і іншае, — адзначыў міністр. Таксама, на яго думку, важным напрамкам з'яўляецца тэхнічнае перааснашчэнне і мадэрнізацыя арганізацый малочнай прамысловасці сыраробных цэхаў, сушыльных установак і мясной прамысловасці. Ідзе работа над паляпшэннем існуючых магчымасцяў мясакамбінатаў, кампрэсарных цэхаў і халадзільнікаў. Узводзяцца ачышчальныя збудаванні, мадэрнізуюцца кацельні, пераабсталёўваюцца каўбасныя і паўфабрыкатныя цэхі.

Словам, вялікая праца адпавядае вялікім задачам.

Ілья КРЫЖЭВІЧ

krуzhеvісh@zvіаzdа.bу

Загаловак у газеце: Будучыня пачынаецца сёння

Дадаць каментар

Выбар рэдакцыі

Грамадства

Надзея для Вары

Надзея для Вары

Калi хварэюць блiзкiя, гэта заўсёды гора, але няма гора большага, чым калi хварэюць дзецi. 

Грамадства

Андрэй Раўкоў: Я не марыў быць генералам

Андрэй Раўкоў: Я не марыў быць генералам

Мiнiстр абароны — пра складаны шлях да генеральскiх пагонаў, перспектывы развiцця беларускай армii i мiрнае неба над галавой.