Вы тут

Цэлы свет на тваіх плячах


Цэлы свет на тваіх плячах

Пад катэгорыяй вагі ў відэагульнях, калі не казаць пра спецыфічныя праекты-пазлы ці гісторыі пра сумаістаў, часцей за ўсё мы маем на ўвазе метафарычную множнасць, “цяжар” - важкасць - гульні. Гэта і яе багаты сюжэт, і разнастайны геймплэй, і вялікі свет. Усё тое, ад чаго мы разяўліваем раты ў здзіўленні і кажам: “Так, гэта важкая гульня”.

Horizon Zero Dawn – гэта важкая гульня. Распрацаваная нідэрландскай студыяй Guerrilla Games для PlayStation 4, гульня выйшла ў лютым-сакавіку 2017 года. Ролевы баявік з адкрытым постапакаліптычным светам: дзеянні адбываюцца прыблізна праз тысячу гадоў ад нашага часу, дзе глабальная трагедыя вярнула людзей да жыцця ў першабытных плямёнах, але сярод жывёлападобных робатаў. Галоўная гераіня, паляўнічая Элой, не прынятая родным племенем Нора, бо яе палічылі праклятай, і вымушаная жыць ізалявана ад сваіх людзей. Яшчэ ў дзіцячым узросце Элой знайшла “фокус”, маленькую прыладу дапоўненай рэальнасці, якая не толькі стане неад’емнай дапамогай ў геймплэі, але і сыграе значную ролю ў сюжэце. Дасягнуўшы паўналецця, Элой прымае ўдзел у Даказванні - спаборніцтве, перамога ў якім дасць ёй тытул Норы Храбрай і зробіць яе паўнапраўнай часткай племені Нора. Элой перамагае, але на племя нападаюць культысты - частка рэлігійнай групы Зацменне, - і Элой ледзь не памірае ад рук іх лідара.

Гульня пачынаецца няспешна: спачатку дзіцячае трыманне за настаўніка, такога ж ізгоя, як і сама Элой, першая знаходка часоў Старога Света - бункера, выпрабаванне “фокуса”. Потым - знаёмства з Нора, спаборніцтвы, якія хоць і даюць магчымасць “памацаць” геймплэй, але не раскрываюць гульнявое багацце ва ўсёй яго разнастайнасці, якім Horizon на самой справе можа пахваліцца.

Horizon Zero Dawn - вялікая гульня. Толькі праз 3-4 гадзіны гулец сапраўды прыступіць да эпічнай прыгоды Элой. І ўжо тады Horizon пачынае бліскаць не горш за прадстаўнікоў класікі жанру: збіральніцтва, рамяство, адкрытая карта свету (ідзі куды пажадаеш!), безліч сайд-квэстаў… І сюжэтны квэст, які без жартаў інтрыгуе і не адпускае да самага канца: ніякага вам “галоўны сюжэтны паварот на пятнацатай гадзіне, яшчэ шэсць даігрываем з упартасці”. Аматары незвычайных сетынгаў і даследчыкі віртуальных сусветаў прымуць Horizon на ўра: тое, што ў пачатку падаецца абсурдным ці занадта таямнічым, цягам гісторыі патлумачыцца і сыграе сваю ролю ў лёсе Элой. А Элой - ролю ў лёсе цэлага свету.

Так, галоўная гераіня Horizon – таксама «важкая». Але яе абранасць – гэта не проста “сюжэтная прылада” ці тытул, гэта неад’емная частка гісторыі сусвету і, што яшчэ важней, персанальнага шляху Элой. Бо адзін з яе матываў адправіцца ў вандроўку па свеце – імкненне знайсці праўду пра сваё паходжанне, якое жыхары племені палічылі праклятым. Хто яна? Дзе яе маці? Чаму яна падобная да навукоўцы са Старога Свету, доктора Эліcабет Собек? І чаму за гэтае падабенства культысты жадаюць яе смерці?

Гуляючы за вольную паляўнічую, мы сустрэнемся з рознымі прадстаўнікамі фауны свету, але самыя дзіўныя – гэта робаты, якія паводзяць сябе як рэальныя драпежнікі. Яны і яны і ёсць асноўны вораг Элой. І багатая зброя гераіні (розныя віды лукаў, кап’ё, пасткі), і адметнасці ў паводзінах і слабых месцах разумных машын не даюць гульцу занудзіцца.

І калі цікавасць гульні і яе персанажаў можна заўсёды спісаць на суб’ектыўнае ўспрыманне, то з аднім фактам спрачацца не стане ніхто: Horizon Zero Dawn – прыгожая гульня. Настолькі прыгожая, што карыстанне “рэжымам фота” часта займае ў гульцоў больш часу, чым актыўная гульня! На карце свету можна знайсці і снежныя горы, якія рэальна скарыць – і атрымаць асалоду ад захапляльнага віду ці даведацца штосьці цікавае пра гэта наваколле. Знойдуцца і лясы, і лугі, і пустыні, і вёскі, і гарады, і руіны; дзень і ноч (і нават надвор’е) змяняюцца… аднім словам, паглядзець ёсць на што. Населеныя пункты дыхаюць паўсядзёным жыццём, радуюць вока арыгінальнай архітэктурай і мясцовай этнікай, а наблюдаць, як тэхніка будучыні суіснуе са “старажытнасцю”, цікава.

Horizon Zero Dawn – гульня, пра якую так і хочацца сказаць “усяго не перакажаш”. Яна сабрала ў сябе шэраг асаблівасцяў лепшых гульняў апошняга часу і здолела ўтрымаць іх, зрабіўшы сваімі. У дадатак да асноўнага сюжэту, тут можна правесці цэлы месяц, гойсаючы за робатамі, збіраючы асколепкі былой цывілізацыі і вырашаючы праблемы кожнага сустрэчнага – ў абгортцы з сучаснай графікі і дзіўнага асяроддзя. І калі гэта не мара, то што?

Валерыя Дзяткова

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.