20 Люты, аўторак

Вы тут

Пераможцы віктарыны «Мая Скарыніяна» наведалі Нацыянальную бібліятэку


Як і абяцалі, абвяшчаючы ўмовы “звяздоўскай” віктарыны, прымеркаванай да 500-годдзя беларускага кнігадрукавання, пераможцы гэтага інтэлектуальнага спаборніцтва трапілі ў Нацыянальную бібліятэку на адмысловую бясплатную экскурсію. Віктарыну “Звязда” праводзіла сумесна з галоўнай кніжнай скарбніцай краіны (пытанні ад Нацыянальнай бібліятэкі ва ўсіх трох турах былі самымі складанымі, бо, у адрозненні ад астатніх, не мелі варыянтаў адказаў).


На экскурсію ў гэту суботу прыехалі чытачы “Звязды” з розных рэгіёнаў краіны. З вуснаў нашага экскурсавода Вольгі Дарожка скарыназнаўцы-аматары даведаліся шмат цікавага пра тое, як будавалася бібліятэка, як яна ўладкаваная, чаму ўласна ў “дыяменце” няма чытачоў (там знаходзіцца кнігасховішча), як адтуль дастаўляюцца кнігі ў чытальную залу (па спецыяльных вузкіх рэйках у кантэйнерах – гэта мы нават убачылі). Паназіралі, як працуюць чытачы ў самай вялікай чытальнай зале, даведаліся, што на трэцім паверсе можна замовіць ноты і самому выканаць на раялі ўпадабаны твор…

Але галоўнай “фішкай” экскурсіі стала наведванне міжнароднай выставы “Францыск Скарына і яго эпоха”, якая нядаўна распачала сваю работу ў сценах бібліятэкі. Гэта без перабольшвання ўнікальная магчымасць пабачыць старадрукі з розных краін, якія выдаваліся блізка па часе да скарынаўскіх кніг. У тым ліку першая друкаваная кніга Еўропы – Біблія Гутэнберга (праўда, толькі адна старонка, прывезеная на выставу з Германіі, але ж – арыгінал!). Экспануюцца і знакавыя для беларусаў кнігі – выданне трэцяга Статута ВКЛ, прывезенае на выставу з Латвіі, Біблія, выдадзеная ў першай друкарні на тэрыторыі сучаснай Беларусі – Берасцейскай – яе прывезлі на выставу з Расіі. Ёсць чым пахваліцца і нашай кніжнай скарбніцы – на выставе  экспануецца арыгінал “Боскай камедыі” Дантэ Аліг’еры 1481 года выдання, які захоўваецца ў беларускай “нацыяналцы”. Унікальная гэта кніга яшчэ і тым, што гравюры ў ёй выкананы паводле эскізаў вялікага Сандра Бацічэлі. Так што калі хто скажа, што работ гэтага вялікага мастака Адраджэння ў нас няма, -- гэта не зусім так.

І, канешне, кнігі самога Скарыны. Тыя, што ёсць у  Нацыянальнай бібліятэцы (іх у нас усяго дзесяць), а таксама прывезеныя з розных краін. Асабліва цікавыя экспанаты – выданні “Малой падарожнай кніжкі” ў трох варыянтах. Адзін з іх нядаўна набыў для сваёй калекцыі “Белгазпрамбанк”, другі прыехаў у Мінск са Славеніі, трэці – з Расіі. Кнігі не аднолькавыя: у “Малой падарожнай кніжцы” Скарына пераплятаў розныя брашуры-часткі Святога Пісання, таму кожна томік адрозніваецца ад іншага.

Напрыканцы экскурсіі ўсе падняліся на аглядную пляцоўку на даху бібліятэкі і, нягледзячы на дождж, змаглі палюбавацца панарамай восеньскай сталіцы.

Спадзяёмся, нават тыя нашы чытачы, што прыехалі здалёк, не пашкадавалі. Мы ж абяцаем, што “Мая Скарыніяна” была не апошняй на старонках і на сайце “Звязды” віктарынай.

Заставайцеся з намі – будзе цікава!

Алена ЛЯЎКОВІЧ

Фота Сяргея НІКАНОВІЧА

Дадаць каментар

Выбар рэдакцыі

Грамадства

Ужо каторы год жыхары змагаюцца супраць агульнай паркоўкі ў двары

Ужо каторы год жыхары змагаюцца супраць агульнай паркоўкі ў двары

Гаспадары двара расказваюць, што раней тры заезды ў двор перакрывалі дэкаратыўныя металічныя вароты, унутр аўтамабілі маглі трапіць толькі праз вялікую арку з боку вуліцы Янкі Купалы.

Спорт

Штотыднёвы спартыўны агляд «Звязды»

Штотыднёвы спартыўны агляд «Звязды»

Пра соты фінал у кар'еры Максіма Мірнага, поспехі беларускіх самбістаў на дамашнім турніры і выступленні нашых гандбольных клубаў у Еўропе.

Культура

Cабраны пераклады верша Янкі Купалы «А хто там ідзе» на 101 мову свету

Cабраны пераклады верша Янкі Купалы «А хто там ідзе» на 101 мову свету

«Беларуская Энцыклапедыя імя Петруся Броўкі» адправіла ў друкарню выданне «А хто там ідзе: на мовах свету».

Палітыка

Прэзідэнт паўдзельнічаў у выбарах і адказаў на пытанні журналістаў

Прэзідэнт паўдзельнічаў у выбарах і адказаў на пытанні журналістаў

За каго аддаць свой голас, якога кандыдата лепей абраць у дзень выбараў у мясцовыя Саветы дэпутатаў?