24 Верасень, панядзелак

Вы тут

На дзедавай зямлі


Козлікі — адзіны жылы хутар у Налібоцкай пушчы на Валожыншчыне. На хутары — тры падвор'і, якія месцяцца далёка адно ад аднаго і належаць Мазалеўскім, Солтанам і Мазурам. Цяпер тут засталіся немаладыя гаспадары, дзеці, і тым больш унукі якіх жывуць у гарадах альбо ў навакольных вёсках абапал пушчы. Здавалася, жыццё на гэтых лясных куточках паціху згасае. Аднак, думаючы так, я памыляўся. Тры гады таму на адной сядзібе пасяліўся малады, цягавіты да працы і надзвычай пазітыўны, ініцыятыўны чалавек Алег Протас — унук Сігізмунда і Соф'і Солтанаў. Малады запал, смеласць брацца за любую работу і цікавыя планы на будучыню прывялі Алега на дзедаву зямлю. Мужчына вырашыў распачаць свой сялянскі лад. Не як фермер і не як прадпрымальнік, а наладзіць звычайнае хутарское жыццё.


— Тут хапае і зямлі, і кармоў — толькі не лянуйся, касі, пасві, даглядай, — кажа Алег, паказваючы мне гаспадарку і сваіх гадаванцаў — адкормленых бычкоў і мітуслівых авечак. — Дзед і баба блаславілі на задуманае. А я тады падумаў, што і яны будуць пад маім наглядам, бо старыя, па дзевяноста ім! На жаль, год таму дзед пайшоў з жыцця.

Алегу цяпер трыццаць шэсць гадоў, ён працуе ў калгасе недалёка ад Івянца, у яго трое дзяцей, але сям'я жыве ў самім Івянцы. Яго мара жыць у вёсцы і займацца сялянскімі справамі часткова спраўдзілася. Узвёў некалькі гаспадарчых пабудоў, трымае цэлую атару авечак — ажно сто трыццаць, некалькі коз, дзесяць бычкоў, у сажалцы плаваюць чароды гусей і качак. На поплаве пасецца незвычайнай плямістай масці жарабец па мянушцы Макс. Па падворку бегаюць дзве дружалюбныя аўчаркі каўказскай пароды — Аза і Арык, якіх Алег завёў для аховы сваёй гаспадаркі — апошнім часам у пушчы развялося шмат ваўкоў, якія смела заходзяць у двары, не баючыся ні чырвоных сцяжкоў, ні ўключанага на ўсю катушку радыё.

Цяпер Алег Протас будуе гасцявы дом, бо плануе стварыць у Козліках аграсядзібу.

— У наш час модна развіваць турыстычную дзейнасць, асабліва ў такім незвычайным месцы, як Налібоцкая пушча, — кажа Алег. — А дапамагае мне дваццацітрохгадовы сваяк Анатоль Бодак. І, зразумела ж, сілы дае дзедава зямля. Таму, думаю, усё ў нас атрымаецца.

Анатоль Кляшчук, фота аўтара

Валожынскі раён

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.