26 Верасень, серада

Вы тут

Працягваецца конкурс на распрацоўку талісмана ІІ Еўрапейскіх гульняў


Дзясяткі ахвотных ужо даслалі свае малюнкі ў Міністэрства інфармацыі, якое займаецца прыёмам конкурсных работ. Сярод удзельнікаў людзі рознага ўзросту і прафесій, тут гэта не галоўнае. Важна, каб прапанаваны талісман адпавядаў агульнай канцэпцыі Еўрапейскіх гульняў, быў лёгкі і зразумелы для балельшчыкаў і гледачоў, выклікаў станоўчыя асацыяцыі і адпавядаў слогану «Brіght Yеаr, Brіght уоu» («Час яскравых перамог»), быў звязаным з купальскай ноччу, а таксама вытрыманы ў адным стылі з лагатыпам Еўрагульняў, на якім намалявана папараць-кветка.


Андрэй Сымук, майстар пагрузачна-разгрузачных работ Магілёўскага аддзялення Беларускай чыгункі, пра конкурс даведаўся з выпуску навін на тэлебачанні і вырашыў паўдзельнічаць. На яго думку, талісманам Еўрагульняў павінен быць мячык з вогненным шлейфам, які сімвалізуе дэвіз турніру.

А вось дзяўчаты — Ганна Мініна і Крысціна Ермашэвіч — непасрэдна звязаны са спортам, яны працуюць інструктарамі-метадыстамі ў Рэспубліканскім цэнтры алімпійскай падрыхтоўкі па лёгкай атлетыцы і падалі сумесную заяўку. Акрамя таго, што на спаборніцтвах у 2019 годзе яны будуць выступаць у ролі суддзяў, могуць стаць яшчэ і аўтарамі талісмана гульняў. Іх ідэя ўвасобілася ў дамавяняці, яно апранута ў вышыванку і лапці, уяўляе сабой фальклорны персанаж. Валасы талісмана размаляваныя ў колеры алімпійскіх кольцаў, але таксама яны звязаны і з гісторыяй свята Купалле. Зялёны — гэта лясы, чырвоны — вогнішча, чорны сімвалізуе цёмную купальскую ноч, блакітны — гэта рэкі і азёры Беларусі, а жоўты — колер сонца. Акрамя таго, дзяўчаты ўпэўненыя, што дамавяня блізкае да беларускага народа, яно добрае і гаспадарлівае.

Анастасія Талкачова, вучаніца адной са сталічных гімназій, зыходзячы з слогана ІІ Еўрапейскіх гульняў, вырашыла прапанаваць у талісманы двух персанажаў — агонь у нацыянальным строі па імені Агеньчык і вавёрку Іскарку. У сваім тлумачэнні да малюнкаў дзяўчына адзначыла, што агонь сімвалізуе надзею, у тым ліку і надзею спартсменаў атрымаць вынік. А вавёрачка як частка гэтага агню таксама імкнецца да перамогі.

Нагадаем, што ўзор талісмана павінен быць прадстаўлены ў электроннай форме ў выглядзе каляровага малюнка, выкананага ў любой тэхніцы (уключаючы камп'ютарную графіку). Яго неабходна суправадзіць кароткай тлумачальнай запіскай, якая раскрые творчыя ідэі аўтара, а таксама змесціць прапановы ў дачыненні да імя (наймення) талісмана.

Конкурс завершыцца 15 лістапада, яго вынікі будуць абвешчаны ў снежні. Уладальнікі першых трох прызавых месцаў атрымаюць запрашальныя білеты на мерапрыемствы ІІ Еўрапейскіх гульняў, а таксама камплекты парадна-спартыўнай экіпіроўкі беларускай зборнай.

Дар'я ЛАБАЖЭВІЧ

lobazhevich@zviazda.by

Загаловак у газеце: Работы з агеньчыкам

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.