22 Чэрвень, чацвер

Вы тут

Як спецназавец пайшоў у цырульнікі


Прафесіі ўжо даўно не дзеляцца на жаночыя і мужчынскія, але, пагадзіцеся, у некаторых амплуа бачыць хлапцоў нязвыкла. Напрыклад, у якасці медыцынскай сястры, кіяскёра, візажыста... ці нават цырульніка. Так, на Рэспубліканскім конкурсе прафесійнага майстэрства «Беларускі майстар — 2017» сярод спецыялістаў па прычосках быў толькі адзін хлопец. Але менавіта яму дасталася перамога. Мінчанін Мікалай КАЗЛОЎ, цырульнік 4-й катэгорыі, падзяліўся, чым яго прыцягнула гэта прафесія і як ён адчувае сябе ў жаночым калектыве.


Складана паверыць, але Мікалай узяў у рукі плойку і нажніцы для валасоў усяго год таму.

— У прафесію прыйшоў выпадкова, — прызнаецца ён. — Вучыўся ў кадэцкім корпусе, потым пайшоў служыць у 5-ю асобную брыгаду спецыяльнага прызначэння (заўсёды марыў аб элітных войсках). Калі вярнуўся дадому, спрабаваў сябе ў розных сферах. Працаваў ахоўнікам, кур'ерам у рэстаране, таксістам, клаў плітку, вырабляў кухонныя фасады... І гэта не ўвесь спіс! Мне хацелася, каб работа была ў радасць. У выніку выбіраў паміж масажыстам і цырульнікам, але, ацаніўшы ўсе плюсы і перспектывы, вырашыў паспрабаваць сябе ў ролі апошняга.

Наконт будучай прафесіі Мікалай раіўся з сястрой, сябрамі, баяўся, што яго не зразумеюць. Тыя спачатку думалі, што хлопец жартуе. Але намеры маладога чалавека аказаліся сур'ёзнымі. Грошай не было, таму Мікалай шукаў бясплатныя курсы з наступным уладкаваннем на работу. Адвучыўся ў сетцы цырульняў «Усход», дзе цяпер і працуе. Планаваў стаць толькі жаночым майстрам, але потым зацікавіўся і мужчынскімі стрыжкамі. На думку Мікалая, дамы — больш патрабавальныя кліенты: «Усе хочуць быць прыгожымі, каб улюбляць у сябе».

Яшчэ падчас курсаў хлопец пачаў удзельнічаць у прафесійных конкурсах. У «Ружы вятроў», напрыклад, спрабаваў свае сілы ў намінацыі «haіr tattoo» (мастацкі выстрыг) — заняў 6-е месца з 15. А ўжо на «Беларускім майстры — 2017» навічка чакаў сапраўдны поспех.

— Да конкурсу мяне рыхтавала майстар Вольга Далідовіч, дзялілася сваім інструментам, бо ў мяне не было ні плойкі, ні шпілек, — з усмешкай успамінае Мікалай. — Хацелася стварыць нешта незвычайнае і цікавае. На прычоску адводзілася 40 хвілін, і ў прынцыпе, калі трэніраваўся, я ўкладваўся ў гэты час. Дарэчы, мадэллю, якая дэманстравала конкурсную работу, была мая сястра.

Адна з аўтарскіх работ маладога цырульніка.

Малады цырульнік прызнаецца, што дагэтуль крыху бянтэжыцца, калі працуе з кліентамі. Паколькі Мікалай яшчэ мае мала вопыту, то звычайна стрыжэ так, як хоча наведвальнік. Па яго назіраннях, сярод дзяўчат цяпер папулярнае карэ з падаўжэннем да твару, а хлопцы аддаюць перавагу стрыжцы паўбокс. А вось са сваімі валасамі юнак не эксперыментаваў: хацеў паспрабаваць, але так і не адважыўся.

— На сваю прычоску я не трачу шмат часу: проста кожны дзень мыю галаву і сушу фенам. Ніякіх укладачных сродкаў. Мне здаецца, што хлопцу не варта праводзіць гадзіны каля люстэрка. Лепш патраціць гэты час на што-небудзь карыснае, напрыклад, адцісканні ці падцягванні. Трэба ж быць мужным! — лічыць былы спецназавец.

У чым сакрэт прыгожых валасоў? Парады для дзяўчат ад майстра-пачаткоўца простыя: менш паліць локаны прасікамі і рабіць маскі. А калі фарбавацца, то лепш у прафесіяналаў, каб не застацца без валасоў.

Цікавімся, як яму працуецца сярод дам. «У жаночым калектыве адчуваю сябе добра. Усе дапамагаюць, калі ў мяне з'яўляюцца нейкія пытанні. Чуў, што калі цырульнік — мужчына, ды яшчэ і добры майстар, да яго выстройваецца з кліентаў чарга. Буду правяраць гэту тэорыю на практыцы», — смяецца Мікалай.

Прафесія цырульніка яму падабаецца тым, што дазваляе быць мастаком. «Тут няма абмежаванняў. Можна рабіць людзей больш шчаслівымі і яркімі! Мне вельмі падабаецца тое, чым цяпер займаюся. Вядома, гэта больш складана, чым я думаў: тут столькі нюансаў, што, здаецца, і паўжыцця не хопіць, каб з усім разабрацца. Але я ўпэўнены, што змагу справіцца».

Наталля ЛУБНЕЎСКАЯ

lubneuskaya@zvіаzda.by

Фота Антона СЦЕПАНІШЧАВА

Загаловак у газеце: Мастак з плойкай у руках, або Як спецназавец у цырульнікі пайшоў

Дадаць каментар

Выбар рэдакцыі

Грамадства

Як «Звязда» асвятляла першыя месяцы Вялікай Айчыннай

Як «Звязда» асвятляла першыя месяцы Вялікай Айчыннай

Калі гартаеш падшыўкі «Звязды», разумееш, як мала мы пра яе ведаем. 

Спорт

Ванеса Каладзінская: Ад Алімпіяды цяпер хочацца большага

Ванеса Каладзінская: Ад Алімпіяды цяпер хочацца большага

Спартыўных поспехаў яна пачала дасягаць рана.

Грамадства

Як школьніку захаваць здароўе?

Як школьніку захаваць здароўе?

Днямі на базе 32-й сталічнай школы прайшла калегія трох міністэрстваў — адукацыі, аховы здароўя, спорту і турызму.

Грамадства

Як адпачыць без рызыкі для жыцця?

Як адпачыць без рызыкі для жыцця?

Па стане на 19 чэрвеня вада адабрала жыцці 99 чалавек, у тым ліку 7 непаўналетніх.