Вы тут

Што рыхтуе фестываль беларускай песні і паэзіі «Маладзечна-2017»


Праграма на вершы Купалы і Коласа, юбілей «Сяброў» і выступленні сучасных паэтаў.

2 і 3 чэрвеня пройдзе XVІІ Нацыянальны фестываль беларускай песні і паэзіі «Маладзечна-2017». Гэта адзінае свята, што мае такі статус: усе творы выконваюцца на нацыянальнай мове. Яскравы конкурс маладых выканаўцаў, выступленне Нацыянальнага акадэмічнага аркестра Беларусі, а таксама праграма, створаная спецыяльна да 135-годдзя Янкі Купалы і Якуба Коласа, — вось асноўнае, чым сёлета будзе здзіўляць любімы фестываль.


— Канцэрты пройдуць пад знакам адной з галоўных падзей у культурным жыцці гэтага года — 135-годдзя з дня нараджэння народных паэтаў Беларусі Янкі Купалы і Якуба Коласа. Гэтым юбілеем, тэмай творчасці песняроў будуць прасякнуты ўсе фестывальныя мерапрыемствы, — адзначыла першы намеснік міністра культуры Беларусі Ірына ДРЫГА. — Адкрыецца фестываль галоўнай падзеяй — конкурсам маладых выканаўцаў эстраднай песні. 2 чэрвеня пройдуць адразу два туры. Падчас апошняга яны выканаюць песні ў суправаджэнні аркестра пад кіраўніцтвам Міхаіла Фінберга на сцэне летняга амфітэатра Маладзечна.

На вечаровым канцэрце-адкрыцці адбудзецца падвядзенне вынікаў конкурсу. А таксама будзе прэзентавана зусім новая праграма — «Купала і Колас. Вы нас гадавалі», аўтарам і складальнікам якой з'яўляецца Міхаіл Фінберг. У ёй будуць і знаёмыя публіцы творы, напісаныя на словы гэтых паэтаў, і абсалютна новыя, якія прэзентуюць упершыню. Завершыцца першы дзень святочным салютам.

Вельмі насычанай чакаецца і праграма другога дня фестывалю — адбудзецца канцэрт акадэмічнай музыкі ў дзіцячай музычнай школе. Штогод там прэзентуюць малавядомыя творы мінулых эпох — кампазітараў XVІІ, XVІІІ і XІX стагоддзяў. У гэты ж дзень артысты фестывалю выступяць у вёсцы Чысць. Канцэрт-закрыццё прымеркаваны да юбілею ансамбля «Сябры». Яго вядучым будзе народны артыст Беларусі Анатоль Ярмоленка.

— Падтрымліваць высокі ўзровень нацыянальнага фестывалю зусім няпроста, — разважае мастацкі кіраўнік — дырэктар Нацыянальнага акадэмічнага аркестра Беларусі Міхаіл Фінберг. — Некаторыя аўтары забараняюць выконваць свае творы — і гэта надзвычай прыкра. Але мы працуем на карысць нашай роднай Бацькаўшчыны. Няма такога кутка ў Беларусі, дзе ні пабываў бы наш аркестр. Нядаўна мы вярнуліся з Вілейкі, там распачалі новы цудоўны фестываль у касцёле... Ужо рэпеціравалі праграму на творы Купалы і Коласа, якую адыграем на фестывалі песні і паэзіі, — атрымалася вельмі каларытна.

Пра тое, што ў Маладзечне ўсіх гасцей сустрэнуць з традыцыйнай гасціннасцю, расказала дырэктар Палаца культуры Маладзечна Святлана САРОКА:

— Горад гатовы да фестывалю: зроблена афармленне, падрыхтаваныя асноўныя ўстановы, у якіх будуць праходзіць мерапрыемствы, а таксама канцэртныя пляцоўкі. Цяпер ідзе вялікая работа з рэжысёрамі і пастаноўшчыкамі. Нам надзвычай прыемна вітаць у сябе творчую эліту Беларусі — паэтаў, кампазітараў, выканаўцаў — адбудзецца шмат добрых і цёплых сустрэч. Прымуць актыўны ўдзел народныя ўзорныя калектывы, лепшыя творцы. Распачнецца фестываль нават раней за 2 чэрвеня — з 31 мая ў нас пачнуць праходзіць прэзентацыі і сустрэчы з прадстаўнікамі Саюза пісьменнікаў Беларусі.

Другі год працуе афіцыйны сайт фестывалю, падкрэсліла Святлана Сарока, на ім можна знайсці ўсю актуальную інфармацыю.

Ніна ШЧАРБАЧЭВІЧ

nina@zviazda.by

Загаловак у газеце: Да канцэртаў — гатовы

Дадаць каментар

Выбар рэдакцыі

Эканоміка

На другасным рынку жылля сталіцы пачаўся так званы студэнцкі бум

На другасным рынку жылля сталіцы пачаўся так званы студэнцкі бум

Як гэта паўплывала на рынак доўгатэрміновай арэнды жылля?

Грамадства

Час змяняць стэрэатыпы ў сістэме ЖКГ

Час змяняць стэрэатыпы ў сістэме ЖКГ

Спажывец — не скаржнік, а кліент.

Грамадства

Чаму ў Беларусі такія актуальныя праблемы воднай гаспадаркі?

Чаму ў Беларусі такія актуальныя праблемы воднай гаспадаркі?

Cпецыялісты б'юць трывогу: 25 працэнтаў проб вады з грамадскіх калодзежаў сёння не адпавядаюць санітарным патрабаванням.