22 Чэрвень, чацвер

Вы тут

У падземцы будзе гучаць класіка


Напэўна, не знойдзецца сярод нас чалавека, які б не ведаў імёнаў Вівальдзі, Баха, Моцарта або Бетховена. А ці здольныя мы назваць хоць бы пяць беларускіх класікаў? Глеб Вайкуль і Дар'я Бараноўская вырашылі выправіць гэту сітуацыю і прапанавалі ўключаць выдатныя творы беларускіх кампазітараў на платформах усіх станцый метро. Падобныя праекты працуюць у падземках Пекіна, Нью-Ёрка, Стакгольма, Лондана, а ў хуткім часе да гэтага спісу далучыцца і Мінск. Сталічныя пасажыры, якія чакаюць цягнік, змогуць атрымаць асалоду ад музыкі Манюшкі, Агінскага, Багатырова. Больш за тое, класіка ў метро не толькі не перашкаджае тэхніцы бяспекі, але і скарачае колькасць правапарушэнняў.

Што яшчэ прапануюць рэалізаваць удзельнікі Рэспубліканскага конкурсу сацыяльных праектаў Sосіаl Wееkеnd? «Звязда» склала падборку самых карысных ініцыятыў.


Для памяці пакаленняў

У Баранавічах супрацоўнікі дзяржаўнага прафесійна-тэхнічнага каледжа сферы абслугоўвання вырашылі добраўпарадкаваць сквер, прысвечаны героям-лётчыкам. Парк імя Степанішчава — двойчы Героя Савецкага Саюза, які ў 1946 годзе трагічна загінуў, — доўгі час знаходзіўся ў запусценні. Цяпер жа ў ім з'явяцца прыгожыя клумбы, ліхтары, лавачкі і, нават, арт-аб'екты — трохметровая «пятля Несцерава» і подыум «Іх імёнамі названы вуліцы нашага горада» (у Баранавічах ‑ 12 вуліц носяць імёны герояў-лётчыкаў).

— Мы хочам змяніць адносіны да патрыятызму ў навучэнцаў і жыхароў мікрараёна, — тлумачаць у каледжы.

Многае ўжо ўдалося зрабіць. Напрыклад, дамовіцца з ЖЭСам, каб той клапаціўся аб старых дрэвах у скверы, апрацоўваў іх ад паразітаў. Клумбы высадзілі самі супрацоўнікі каледжа. А навучэнцы, якія асвойваюць прафесію цырульніка, бясплатна рабілі стрыжкі гараджанам у абмен на ахвяраванні на арт-аб'екты. Плануецца, што «пятля Несцерава» і мемарыяльны подыум упрыгожаць сквер ужо ў снежні гэтага года.

«Свой чалавек» у адміністрацыі

Узаемадзейнічаць з дзяржаўнымі органамі стане прасцей. Бясплатная электронная праграма — бот-дзяржслужачы — дапаможа рыхтаваць і запаўняць дакументы (віртуальны «чыноўнік» умее распазнаваць пашпарт і ўносіць гэтыя даныя ў даведкі), а таксама будзе падказваць, куды і калі звяртацца, каб вырашыць праблему, якая вас хвалюе (напрыклад, аформіць ІП). Праграма ўжо працуе ў месенджары «тэлеграм», потым будзе даступна і для карыстальнікаў сацыяльнай сеткі «Фэйсбук». Распрацоўшчыкі запэўніваюць, што разабрацца ў праграме зможа любы чалавек, далёкі ад праграмавання. А чыноўнікі толькі падтрымліваюць ініцыятыву, якая павысіць юрыдычную адукаванасць насельніцтва і скароціць час, неабходны на розныя адміністрацыйныя працэдуры.

Клавіятура для ўраўненняў і чарцяжоў

«Разумную» клавіятуру, з дапамогай якой можна выконваць дамашнія заданні па розных прадметах, распрацавалі студэнты БДУІР і БНТУ. А пачалося ўсё з асабістай гісторыі. Год таму Дзіма Кузьміч трапіў у бальніцу. Яго суседам па палаце быў хлопчык з ДЦП. Праз дыягназ школьніку складана было пісьмова рашаць задачы і чарціць графікі. Тады Дзіма і вырашыў прыдумаць сэрвіс, які дапаможа дзецям з парушэннямі дробнай маторыкі выконваць заданні па фізіцы, хіміі і матэматыцы. Клавіятура «Sсrаwlеss» — гэта праграма, якая ўсталёўваецца на смартфон ці планшэт. На ёй можна лічыць у слупок, рашаць ураўненні, зручна афармляць нелінейныя запісы, напрыклад дробы. Стандартная фізічная клавіятура не адаптавана для гэтага, і вучні трацяць шмат часу на пошук патрэбных сімвалаў для запісу прыкладаў.

— Праект вырашае некалькі праблем, — расказвае Дзмітрый Кузьміч. — Дзеці будуць вучыцца лічыць самастойна, а не на калькулятары, рабіць чарцяжы (звычайна яны выкарыстоўваюць ужо намаляваныя бацькамі ці надрукаваныя ў сшытках).

Каманда праекта наведвала Рэспубліканскі рэабілітацыйны цэнтр для дзяцей-інвалідаў, дзе пратэсціравала «разумную» клавіятуру і ўпэўнілася, што яна зручная для школьнікаў. Плануецца, што поўная версія праграмы будзе запушчана ў канцы жніўня, якраз да пачатку навучальнага года.

Жыццё пасля інсульту

Па статыстыцы, 70 працэнтаў людзей, што перажылі інсульт, — гэта інваліды, якія маюць патрэбу ў рэабілітацыі. На жаль, забяспечыць рэабілітацыю бясплатна дзяржава можа толькі на 45 дзён у годзе. Што рабіць у астатнія 320? Прыватныя медцэнтры і наёмныя спецыялісты каштуюць дорага, а каб займацца самастойна, патрэбны пэўныя веды. Урач-неўролаг Дар'я Цішына запускае анлайн-рэсурс рrоіnsult.bу, дзе дапамогуць арганізаваць дамашнюю рэабілітацыю дыстанцыйна. Чалавек, які перанёс інсульт, ці яго сваяк змогуць атрымаць індывідуальную праграму практыкаванняў, навучыцца правільна іх выконваць (для гэтага ёсць друкаваныя інструкцыі і відэаўрокі) і фіксаваць у табліцы дасягненні. Чакаецца, што ў год будзе складацца 12,5 тысячы індывідуальных планаў. Плюс дадаткова будуць раводзіцца семінары і сустрэчы.

Падобныя праекты паспяхова рэалізуюцца ў ЗША, Аўстраліі, Канадзе. На тэрыторыі СНД аналагаў няма, таму беларускі рэсурс мае вялікі патэнцыял.

Родныя людзі

У ліпені ў Навагрудскім раёне правядуць Другі фестываль сем'яў усынавіцеляў «Родныя людзі». Бацькі змогуць адпачыць, абмяняцца досведам, атрымаць псіхалагічную дапамогу. Чаму гэта важна?

— Парадокс, але паток грамадскай увагі скіраваны ў большай ступені на дзіцячыя дамы, а не на прыёмныя сем'і, і тым самым умацоўваецца сіроцтва, а не сямейнае ўладкаванне малых, — лічыць каардынатар праекта, псіхолаг Вольга Галаўнёва. — Людзі не адважваюцца на ўсынаўленне, бо баяцца апынуцца з цяжкасцямі ў выхаванні сам-насам. Закрытасць гэтай тэмы параджае прадузятасць у адносінах да сірот.

Першы фестываль у фармаце палатачнага лагера прайшоў два гады таму ў Мінскай вобласці і сабраў больш за 100 чалавек. Арганізатары спадзяюцца, што падобныя мерапрыемствы будуць спрыяць развіццю культуры ўсынаўлення, а прапаганда яго як гераічнага выратавання сірот зменіцца спакойнымі і паважлівымі адносінамі да дзяцей і сем'яў, якія знайшлі адно аднаго.

Наталля ЛУБНЕЎСКАЯ

lubnеuskауа@zvіаzdа.bу

Загаловак у газеце: Агінскі ў метро і віртуальны чыноўнік

Дадаць каментар

Выбар рэдакцыі

Грамадства

Як «Звязда» асвятляла першыя месяцы Вялікай Айчыннай

Як «Звязда» асвятляла першыя месяцы Вялікай Айчыннай

Калі гартаеш падшыўкі «Звязды», разумееш, як мала мы пра яе ведаем. 

Спорт

Ванеса Каладзінская: Ад Алімпіяды цяпер хочацца большага

Ванеса Каладзінская: Ад Алімпіяды цяпер хочацца большага

Спартыўных поспехаў яна пачала дасягаць рана.

Грамадства

Як школьніку захаваць здароўе?

Як школьніку захаваць здароўе?

Днямі на базе 32-й сталічнай школы прайшла калегія трох міністэрстваў — адукацыі, аховы здароўя, спорту і турызму.

Грамадства

Як адпачыць без рызыкі для жыцця?

Як адпачыць без рызыкі для жыцця?

Па стане на 19 чэрвеня вада адабрала жыцці 99 чалавек, у тым ліку 7 непаўналетніх.