20 Люты, аўторак

Вы тут

Кожны ахвотны змог выставіцца ў «Доме карцін»


Галерэя «Дом карцін», што станоўча зарэкамендавала сябе пачынаючы з першай выставы і надалей, арганізавала даволі экстравагантны праект: на працягу трох дзён у парадку жывой чаргі прымала ад кожнага ахвотніка па адным творы, які тут жа манціравала ў экспазіцыю. Аўтарам не трэба было даказваць наяўнасць спецыяльнай адукацыі ці казыраць удзелам у міжнародных праектах — работы прымаліся ад усіх. Патрабаванне толькі адно: каб творы пралазілі праз дзверы. Тое, што атрымалася, — выставу жартаўліва назвалі «Я Манэ, Я Шышкін, Я Малевіч» — ужо можна ўбачыць у залах галерэі.


Акцыя праходзіла з 29 да 31 студзеня, толькі за першы дзень у прастору прыйшло каля трохсот аўтараў, а ў выніку экспазіцыя складаецца з 661 твора мастацтва, як можна здагадацца, абсалютна розных па жанрах і тэхніках. Усе залы галерэі «Дом карцін», такім чынам, занятыя канцэптуальна між сабой не звязанымі работамі, якія прынеслі сюды самі творцы.

Ідэя акцыі — не новая, яшчэ ў 1978 годзе яе ўвасобіў легендарны, у тым ліку дзякуючы сваім эксцэнтрычнасці і бунтарству, куратар Уолтэр Хопс, які за сваю працоўную дзейнасць арганізаваў больш як сто мастацкіх выстаў. Нечаканых, незвычайных, дзіўных. Адной з яго ініцыятыў была выстава «36 гадзін», якая прайшла ў альтэрнатыўнай прасторы — Музеі часовага мастацтва (Museum of Temporary Art) у Вашынгтоне. Сам Уолтэр Хопс цягам 36 гадзін сустракаў візіцёраў, прымаў іх творы і адразу ўстаўляў у экспазіцыю. Да ўдзельнікаў было толькі адно патрабаванне — вядома ж, каб творы пралазілі ў дзверы. Адзін хлопец падпісаў змяты, вырваны з часопіса, фотаздымак голай жанчыны і прынёс яго ў Музей, сцвярджаючы, што гэта яго твор, — Хопс у выніку знайшоў кут без падсветкі і сказаў: «Вось выдатнае месца для тваёй работы».

Выстава «36 гадзін» стала цудоўным прыкладам альтэрнатыўнай «дзвіжухі» ў сферы мастацтва і ў нашай сучаснасці, калі куратарская работа ў Беларусі таксама адрываецца ад акадэмічнасці, калі з'яўляецца ўсё больш і больш так званых альтэрнатыўных пляцовак і ў гэты ж час зусім не проста арганізаваць персанальную выставу, такія напрацоўкі прыходзяцца вельмі дарэчы. Прыемна, што тут няма канфлікту прафесійнага і непрафесійнага мастацтва, высокага і іранічнага, вядомага і не.

Кожны наведвальнік выставы «Я Манэ, Я Шышкін, Я Малевіч» з усёй разнастайнасці прадстаўленых твораў можа выбраць трох фаварытаў. Падлік галасоў у выніку выявіць уладальніка Прыза глядацкіх сімпатый, які атрымае магчымасць правесці ў галерэі «Дом карцін» персанальную выставу.

Экспазіцыю можна паглядзець да 26 лютага.

Ірэна КАЦЯЛОВІЧ

katsyalovich@zviazda.by

Загаловак у газеце: Галоўнае — пралезці праз дзверы

Дадаць каментар

Выбар рэдакцыі

Грамадства

Ужо каторы год жыхары змагаюцца супраць агульнай паркоўкі ў двары

Ужо каторы год жыхары змагаюцца супраць агульнай паркоўкі ў двары

Гаспадары двара расказваюць, што раней тры заезды ў двор перакрывалі дэкаратыўныя металічныя вароты, унутр аўтамабілі маглі трапіць толькі праз вялікую арку з боку вуліцы Янкі Купалы.

Спорт

Штотыднёвы спартыўны агляд «Звязды»

Штотыднёвы спартыўны агляд «Звязды»

Пра соты фінал у кар'еры Максіма Мірнага, поспехі беларускіх самбістаў на дамашнім турніры і выступленні нашых гандбольных клубаў у Еўропе.

Культура

Cабраны пераклады верша Янкі Купалы «А хто там ідзе» на 101 мову свету

Cабраны пераклады верша Янкі Купалы «А хто там ідзе» на 101 мову свету

«Беларуская Энцыклапедыя імя Петруся Броўкі» адправіла ў друкарню выданне «А хто там ідзе: на мовах свету».

Палітыка

Прэзідэнт паўдзельнічаў у выбарах і адказаў на пытанні журналістаў

Прэзідэнт паўдзельнічаў у выбарах і адказаў на пытанні журналістаў

За каго аддаць свой голас, якога кандыдата лепей абраць у дзень выбараў у мясцовыя Саветы дэпутатаў?