26 Люты, нядзеля

Вы тут

Адкрылася выстаўка лінарыту Яўгеніі Цыбульскай «Ех Lіbrіs.Кніжны знак»


У Нацыянальным гістарычным музеі Рэспублікі Беларусь адкрылася выстаўка лінарыту Яўгеніі Цыбульскай «Ех Lіbrіs. Кніжны знак».


Назва «экслібрыс» паходзіць ад лацінскага выразу ех lіbrіs, што ў перакладзе на беларускую гучыць «з кніг». Экслібрыс — гэта маленькая гравюра, кніжны знак, які змяшчаюць у сваіх кнігах уладальнікі прыватных бібліятэк, пачынаючы з часоў вынаходніцтва кнігадруку. Цяпер мала хто выкарыстоўвае экслібрыс па яго прамым прызначэнні: кніжны знак усё больш адыходзіць да сферы цікаўнасці калекцыянераў, дзе экслібрысы збіраюць, заказваюць і нават імі абменьваюцца. Нягледзячы на невялікі памер, ех lіbrіs дае вялікую прастору для творчасці, бо акрамя імя ды прозвішча ўладальніка змяшчае малюнак на вольную тэму.

— Сюжэтам для малюнка можа быць прафесія, захапленне, нават любімая жывёла. Часам нагодай для экслібрыса становіцца жарт, зразумелы толькі самому адрасату і набліжаным да яго людзям, — расказала мастачка Яўгенія Цыбульская. — Работы, прадстаўленыя на выстаўцы ў гістарычным музеі, рыхтаваліся за 2015—2016 гады. У экспазіцыі сабраны розныя па тэматыцы экслібрысы, прысвечаныя мастакам, музыкантам, літаратарам, дзеячам культуры. Некаторых я ведаю даўно, і экслібрысы для іх ствараліся на аснове цёплага сяброўства, а некаторыя кніжныя знакі зроблены пад уплывам першага ўражання ад знаёмства з чалавекам літаральна пасля некалькіх дзён пасля сустрэчы.

Мастак Яўгенія Цыбульская ў сваёй творчасці звяртаецца да розных графічных жанраў. Першая яе выстаўка «Мяжа імглы» таксама ладзілася ў Нацыянальным гістарычным музеі Беларусі. Там маладая мастачка прадстаўляла станковую графіку: вялікія фарматы, філасофскія тэмы, пошукі сэнсу... Экслібрыс — наступны жанр і магчымасць прадэманстраваць іншы бок таленту. Невялікая зала забяспечвае гледачу шчыльны кантакт з творамі, праз які маленькі па памеры малюнак у светлай рамцы становіцца больш блізкім, а прыхаваныя жарты — больш зразумелымі. Пасля віншаванняў і ўступных слоў госці перайшлі ў наступную залу з рэпрадукцыяй друкарскага станка ХVІ стагоддзя і выявай Францыска Скарыны: выстаўка Яўгеніі Цыбульскай у гістарычным музеі пачынае серыю мерапрыемстваў, прысвечаную 500-годдзю беларускага кнігадрукавання. Тым больш што Францыск Скарына не толькі першадрукар, але і пачынальнік традыцыі экслібрыса на Беларусі.

Выстаўкі экслібрысаў — рэдкая з'ява ў нашай краіне. Напэўна, самая знакамітая праводзілася ў 1960 годзе, калі Нацыянальны мастацкі музей Беларусі прадстаўляў экслібрысы Анатоля Тычыны.

— Экслібрысы — мініяцюрныя творы, больш набліжаныя да кабінетнай графікі. Асобнай калекцыі экслібрысаў у гістарычным музеі няма, — зазначыў Алег Ладзісаў, вучоны сакратар Нацыянальнага гістарычнага музея. — Мы імкнёмся даваць магчымасць маладым таленавітым мастакам прадэманстраваць свае творчыя набыткі, таму трымаем пляцоўку для такіх праектаў, як «Ех Lіbrіs. Кніжны знак».

Дар'я ЧАРНЯЎСКАЯ

Загаловак у газеце: Гравюра. Захапленне. Жарт

Дадаць каментар

Выбар рэдакцыі

Эканоміка

Максімальная стаўка па валютным дэпазіце - 2.5% гадавых

Максімальная стаўка па валютным дэпазіце - 2.5% гадавых

Аднак пры выбары дэпазітаў трэба звяртаць увагу не толькі на памер працэнтаў.

Грамадства

Карэспандэнт «Звязды» наведаў морг

Карэспандэнт «Звязды» наведаў морг

І пастараўся праверыць міфы і чуткі, зняпраўдзіць стэрэатыпы.

Грамадства

Уступныя іспыты рэфармуюць?

Уступныя іспыты рэфармуюць?

А ў школах могуць увесці так званыя міністэрскія кантрольныя работы.

Грамадства

Як працуе жодзінскі Цэнтр патрыятычнага выхавання моладзі «Вектар»

Як працуе жодзінскі Цэнтр патрыятычнага выхавання моладзі «Вектар»

За 18 гадоў існавання праз Цэнтр патрыятычнага выхавання моладзі «Вектар», што ў Жодзіне, прайшло больш як тры тысячы падлеткаў.