Вы тут

«Беларусь 5» выбірае «народных каментатараў»


...Адбылося, спадарства. Нарэшце ў «канапавых крытыкаў», якім не падабаюцца стыль і манера выкладання тэлевізійнікамі спартыўных падзей, з'явілася магчымасць устаць з канапы і самім паказаць, як трэба. Спартыўны тэлеканал «Беларусь 5» днямі правёў набор удзельнікаў у новае рэаліці-шоу «Накаўт-раўнд», пераможца якога папоўніць шэрагі каментатараў і на ўласнай скуры дазнаецца, ці лёгкі гэта хлеб.


Ахвотных, заўважым, набралася нямала — дырэкцыя тэлеканала атрымала звыш 100 заявак з розных гарадоў. Прагледзеўшы анкеты і праслухаўшы аўдыяфайлы з самапрэзентацыямі кандыдатаў, на другі этап адбору — сустрэчу пад прыцэлам тэлекамер — арганізатары праекта запрасілі крыху больш за 60 чалавек. За тым, як праходзіў кастынг каментатараў, паназірала і «Звязда».

«Размова будзе доўжыцца ўсяго некалькі хвілін, таму пастарайцеся максімальна ярка праявіць сябе. Бывае, што дастаткова і хвіліны, каб разгледзець патэнцыял каментатара, а бывае, патрабуецца даволі шмат часу, таму калі адзн з вас правядзе ў студыі дзве хвіліны, а другі — дзесяць, гэта нічога не значыць, — папярэджвае патэнцыйных зорак тэлеэфіру дырэктар «Беларусь 5» Аляксандр Казюкевіч. — Сёння вы можаце заўважыць адабрэнне або сумненне ў нашых галасах, але не пачуеце ні «так», ні «не».

Пасля кароткага інструктажу ў студыю ўваходзіць першы прэтэндэнт. Гісторыя ў Дзяніса Акуловіча досыць тыповая: з дзяцінства захапляўся спортам, глядзеў футбол і запамінаў склад камандаў СССР, пазней сам заняўся футболам, хакеем і нават шахматамі, а цяпер рашыўся адолець чарговую прыступку — расказваць пра футбол і хакей іншым балельшчыкам. Пра глыбокае веданне тэмы ў прыватнасці і вялізную любоў наогул да спорту, беларускага і сусветнага, сцвярджаў практычна кожны ўдзельнік кастынгу — што не замінала некаторым з іх часам блытаць каментатараў Сяргея Новікава і Уладзіміра Навіцкага, «сыпацца» на дадатковых пытаннях, скажам, пра сучасны біятлон ці бокс або губляцца пры просьбе перакласці тыповую фразу з футбольнага рэпартажу на англійскую мову. «Гэта ўсё хваляванне», — апраўдваліся кандыдаты.

Але нязвыклая абстаноўка і пільнае вока тэлекамеры бянтэжылі далёка не ўсіх. Як рыбы ў вадзе адчувалі сябе ўжо вопытныя спартыўныя журналісты — карэспандэнт Агенцтва тэленавінаў Павел Капуцкі, карэспандэнты з іншых тэлеканалаў. А прафесійны настольны тэнісіст Сяргей Комса, які ўжо 4 гады трэніруе дзяцей у Салігорску, аказаўся яшчэ і вопытным рыбаловам, членам нацыянальнай зборнай па паплавочнай лоўлі. Ён з такім імпэтам расказваў пра гэта сваё захапленне, што, здавалася, заслухаліся нават аператары.

— Добра, калі вы такі заўзяты рыбалоў, назавіце, калі ласка, самы вядомы ў сусветнай літаратуры твор пра рыбака, — папрасілі члены журы.

— Гэта вельмі лёгкае пытанне, — заўсміхаўся малады чалавек, — Эрнест Хемінгуэй, «Стары і мора».

Мінчанцы Наталлі Астапчук таксама ўдалося прыцягнуць да сябе ўвагу — мініяцюрная дзяўчына аказалася адзінай сярод удзельнікаў-хлопцаў. «Муж спачатку пасмяяўся з майго жадання адправіць заяўку на кастынг спартыўных каментатараў, — прызналася Наталля, — але я настроена пабіцца за перамогу. Жанчын-каментатараў у эфіры не так шмат, гэта хутчэй выключэнне з правілаў. Але, на мой погляд, каментаваць футбол або цяжкую атлетыку — гэта крута, гэта верх прафесіяналізму».

— Мы звяртаем увагу на самыя розныя аспекты, улічваем і адукацыю, і ўзрост кандыдатаў, — расказаў «Звяздзе» дырэктар «Беларусь 5» Аляксандр Казюкевіч. — Хоць запрасілі і некалькіх удзельнікаў, якія не зусім адпавядалі ўмовам адбору, але было вельмі цікава з імі пазнаёміцца і паказаць гледачам спектр ахвотных стаць каментатарамі. Пакуль магу зазначыць, што агульны ўзровень менавіта гэтага праекта самы высокі з усіх кастынгаў, што мы праводзілі. Бачна, што людзі рэальна ацанілі свае магчымасці і ступень падрыхтоўкі.

Адбор — справа не аднаго дня, журы прагледзела некалькі груп, з якіх 16 чалавек трапяць непасрэдна ў рэаліці-шоу. Іх імёны будуць названыя ў тэлеэфіры «Беларусь 5» 31 снежня. А далей для адабраных шчасліўчыкаў пачнецца штотыднёвае спаборніцтва — уласна «Накаўт-раўнд». Удзельнікаў праекта аб'яднаюць у квартэты па відах спорту і будуць адсейваць: у паўфінал трапяць 8 кандыдатаў, у фінал — 4, а на ўмоўны каментатарскі п'едэстал-крэсла — як і належыць, толькі адзін. (Хоць тыя, хто сябе добра зарэкамендуе, з поля зроку тэлевізійнікаў дакладна не выпадуць і, магчыма, у будучым таксама рэалізуюцца ў эфіры.) Выбіраць найлепшага будуць сумесна прадстаўнікі медыяхолдынгу Белтэлерадыёкампаніі, вядучыя спартыўныя журналісты і дзейныя каментатары, а таксама, зразумела, тыя, для каго ўся справа распачыналася — тэлегледачы.

Вікторыя ЦЕЛЯШУК

Загаловак у газеце: Застанецца толькі адзін

Дадаць каментар

Выбар рэдакцыі

Грамадства

Прэзідэнт добраўпарадкаваў Трафімаву крыніцу на Шклоўшчыне

Прэзідэнт добраўпарадкаваў Трафімаву крыніцу на Шклоўшчыне

Трафімава крыніца была адноўлена некалькі гадоў таму па даручэнні Прэзідэнта.

Грамадства

Рэспубліканскі суботнік прайшоў у Беларусі

Рэспубліканскі суботнік прайшоў у Беларусі

Кіраўнікі дзяржорганаў будуць працаваць на суботніку на сваёй малой радзіме.

Грамадства

Мінфін устанавіў парадак пералічэння заробленых на суботніку сродкаў

Мінфін устанавіў парадак пералічэння заробленых на суботніку сродкаў

Пастанова апублікавана на Нацыянальным прававым інтэрнэт-партале.

Грамадства

Хобі звычайнага студэнта пераўтварылася ў інтэрактыўны музей

Хобі звычайнага студэнта пераўтварылася ў інтэрактыўны музей

Ці ведаеце вы, што першы ў свеце ноўтбук важыў больш за 20 кілаграмаў, а першы планшэт меў дыскавод для пяціцалёвых дыскет?