Вы тут

Унутраная свабода Святланы Кастрыцы


Філасофія прыроды, гармонія свету і атмасфера ўтульнасці... Мастачка, член Беларускага саюза мастакоў, выкладчыца Мінскага дзяржаўнага каледжа імя Аляксея Глебава Святлана Кастрыца выкарыстоўвае гэтыя складнікі ў творчасці і на асабістым прыкладзе дэманструе, як узнікае адзінства душы і наваколля. Сёлета аўтар святкуе дваццацігоддзе з пачатку творчай дзейнасці. З нагоды юбілею ў мастацкай галерэі «Універсітэт культуры» адкрылася выстаўка творцы «Прастора і свет».


За апошнія пяць месяцаў гэта другі вернісаж, дзе Святлана Кастрыца прадстаўляе мастацкія кампазіцыі. Толькі першая экспазіцыя складалася з невялікай колькасці работ, а вось другая — прыемны падарунак для мастачкі: у галерэі для твораў аўтара адведзены тры залы, у кожнай размешчаны работы розных перыядаў мастацкай яе дзейнасці.

Экспазіцыя складаецца з пейзажных палотнаў, нацюрмортаў і партрэтаў. Творчасць Святланы Кастрыцы нібы музыка — кранае абсалютна розныя струны душы, захапляе інтрыгай, нечаканасцю. Якраз адчуванне такога трапятання ў душы канцэнтруе ўвагу на дробязях, якіх, дарэчы, у работах мастачкі шмат.

Творчасць Святланы Кастрыцы вызначаецца стылістычнай разнастайнасцю (эксперыментальны жывапіс, рэалізм, імпрэсіянізм). Мастачка спрабуе гарманічна спалучаць простору святла (адсюль і назва выстаўкі) з больш насычанымі адценнямі. Але ж няўзброеным вокам бачна, што святло перамагае, у творах апошняга часу яно літаральна запаўняе палатно цалкам.

Як адзначыла на адкрыцці праекта куратар выстаўкі, мастацтвазнаўца, культуролаг Ксенія Сяліцкая-Ткачова, творы Святланы Кастрыцы — гэта чысціня, лірычная споведзь душы, што глыбока раскрывае асобу аўтара перад гледачом. Пагрузіцца ў прастору мастачкі — значыць злавіць кавалачак душэўнага цяпла, адчуць духоўную змястоўнасць аўтарскіх вобразаў.

Мастачка даволі часта ўдзельнічае ў пленэрах, як мясцовых, так і замежных. Таму тэма прыроды ў яе творчасці з'яўляецца адной з галоўных. У экспазіцыі каларыстычныя пейзажы змяняюцца адзін за адным. Здаецца, што разам яны ствараюць вялікі калаж альбо мастацкую кінастужку, дзе кадры поўняцца мяккімі беларускімі краявідамі ў розным выкананні.

Партрэты аўтара падзяляюцца на некалькі тыпаў: ёсць пяшчотныя, лёгкія, выкананыя ў пастэльных танах, а ёсць і з магічным падтэкстам. Тут многае таксама залежыць ад перыядаў творчасці, у якіх унутранае адчуванне і падзеі калісьці выконвалі важную ролю.

Наогул, ад асобы мастака залежыць шмат што. У выпадку Святланы Кастрыцы яе ўнутраная гармонія, святло і спакой дакладна перададзены ў мастацкіх творах. Адразу заўважны мастацкі почырк аўтара, стаўленне творцы да прыроды, чалавека і нават грамадства. Святлана Кастрыца — мастачка, здольная адкрыць свой свет для людзей. На працягу многіх гадоў яна не толькі вучыць дзетак мастацкай справе, але ж і сама вучыцца не губляць цеплыню і святло душы.

Вікторыя АСКЕРА

Загаловак у газеце: Адзінства душы і наваколля

Дадаць каментар

Выбар рэдакцыі

Грамадства

Прэзідэнт добраўпарадкаваў Трафімаву крыніцу на Шклоўшчыне

Прэзідэнт добраўпарадкаваў Трафімаву крыніцу на Шклоўшчыне

Трафімава крыніца была адноўлена некалькі гадоў таму па даручэнні Прэзідэнта.

Грамадства

Рэспубліканскі суботнік прайшоў у Беларусі

Рэспубліканскі суботнік прайшоў у Беларусі

Кіраўнікі дзяржорганаў будуць працаваць на суботніку на сваёй малой радзіме.

Грамадства

Мінфін устанавіў парадак пералічэння заробленых на суботніку сродкаў

Мінфін устанавіў парадак пералічэння заробленых на суботніку сродкаў

Пастанова апублікавана на Нацыянальным прававым інтэрнэт-партале.

Грамадства

Хобі звычайнага студэнта пераўтварылася ў інтэрактыўны музей

Хобі звычайнага студэнта пераўтварылася ў інтэрактыўны музей

Ці ведаеце вы, што першы ў свеце ноўтбук важыў больш за 20 кілаграмаў, а першы планшэт меў дыскавод для пяціцалёвых дыскет?